दीपक न्यौपाने, बुटवल
भ्याली च्यासल युवा क्लबले २१ औं तिलोत्तोमा गोल्डकप फुटबल प्रतियोगिताको क्वाटरफाइनलमा स्थान पक्का गरेको छ । सोमबार भएको खेलमा च्यासलले सीएमजी क्लब संकटालाई २-० ले पराजित गर्यो ।
च्यासलको जितमा दुवै गोल दोस्रो हाफमा सम्भव भएको थियो । खेलको ४९ औं मिनेटमा अर्मान्ड मोएनले सुरुवाती अग्रता दिलाएका थिए । त्यसको ४ मिनेटपछि नै सजिन थापामगरले गोल गर्दै च्यासललाई बलियो स्थितिमा पुर्याएका थिए ।
खेलमा उत्कृष्ट प्रदर्शन गरेका अर्मान्ड खेलको म्यान अफ द म्याच भए । उनले १० हजार रुपैयाँ प्राप्त गरे । च्यासलले अब क्वाटरफाइनलमा ए डिभिजन लिग विजेता मनाङ मर्स्याङदी क्लबको सामना गर्नेछ । उक्त खेल फाल्गुन ९ गते हुनेछ ।
प्रतियोगिताअन्तर्गत मंगलबार भारतको ब्रदर्स युनाइटेड र नेपाल पुलिस क्लब खेल्नेछन् ।
