एजेन्सी – यूईएफए च्याम्पियन्स लिग अन्तर्गत मंगलबार भएको राउन्ड अफ १६ को पहिलो लेगमा लिभरपुल बायर्न म्युनिखको खेल गोलरहित बराबरीमा टुंगिएको छ ।
लिभरपुलको घरेलु मैदान एनफिल्डमा पाहुना टोलीले रक्षात्मक रणनीति अपनाउँदै राम्रो प्रदर्शन गरेपछि लिभरपुलले गोल गर्न सकेन । साडियो मानेले झन्डै आधा दर्जन प्रयासलाई सदुपयोग गर्न सकेनन् । बायर्नले पनि पाएको थोरै अवसरमा अपेक्षित आक्रमण गर्न नसक्दा गोलरहित बराबरीमा चित्त बुझाउनुपर्यो ।
बायर्नले लिभरपुलको मैदानमा लगातार तेस्रो पटक गोलरहित बराबरी खेलेको छ । यता प्रशिक्षक योर्गेन क्लोपले बायर्नविरुद्ध ३० औं पटक खेल्दा पहिलो पटक गोलरहित बराबरीको नतिजा आत्मसात गरेका छन् । बायर्नले च्याम्पियन्स लिगको पछिल्लो ९ अवे खेलमा अपराजित यात्रा कायम गरेको छ ।
बायर्नले खेल अवधिभर कुनै प्रहार पनि पोस्टको दिशामा प्रहार गर्न सकेन । दोस्रो लेगको खेल बायर्नको घरेलु मैदानमा १३ मार्चमा हुनेछ ।
