एजेन्सी – प्रिमियर लिग क्लब चेल्सी माल्मोलाई पराजित गर्दै यूईएफए युरोपा लिगको अन्तिम १६ मा प्रवेश गरेको छ । बिहीबार घरेलु मैदानमा ३-० को जित दर्ता गर्दै चेल्सी ५-१ ले विजयी रह्यो ।
निकै प्रतिस्पर्धात्मक खेलको पहिलो हाफमा दुवै टोलीले गोल गर्न सकेनन् । दोस्रो हाफको ५५ अौं मिनेटमा अोलिभिएर जिरुडले चेल्सीको लागि गोलको खाता खोले । ७३ अौं मिनेटमा माल्मोका रास्मस बेङगस्टन दोहोरो पहेंलो कार्ड खाँदै बाहिरिएपछि माल्मो १० खेलाडीमा सिमित भयो ।
त्यसको लगत्तै रस बार्कलीले फ्रिकिकमा उत्कृष्ट गोल गर्दै चेल्सीलाई जित नजिक पुर्याए । ८४ अौं मिनेटमा क्यालम हड्सन अोडोईले अर्को गोल थप्दै चेल्सीको जित पक्का गरे । पहिलो लेगमा चेल्सी २-१ ले विजयी रहेको थियो ।
