दीपेन्द्र पोखरेल काठमाडौं –
फिफाको अपिल कमिटिले आफ्नो अपिललाई पूर्ण रुपमा खारेज गर्दा आफुलाई निकै निराश बनाएको प्रतिबन्धित अखिल नेपाल फुटबल संघ (एन्फा) का अध्यक्ष गणेश थापाले बताएका थिए ।
कात्तिकमा फिफाको एथिक्स कमिटीले भ्रष्टाचारको अभियोगमा १० बर्षे प्रतिबन्धका साथै झन्डै २१ लाख रुपैयाँ जरिवाना तोकेको थियो । त्यसविरुद्ध थापाले गरेको अपिललाई अपिल कमिटिले शुक्रबार खारेज गर्दै कारवाहीलाई यथावत राख्ने निर्णय गरेको थियो । ‘अपिल कमिटीको निर्णय मैले प्राप्त गरे । मेरो अपिल खारेज भएको छ,’ थापाले शनिबार विज्ञप्ती जारी गर्दै भनेका छन्,‘यसले मलाई निराश बनाएको छ ।’ उनले अब आफु कोर्ट अफ आर्बिट्रेसन फर स्पोर्ट (सिएएस) मा अपिल गर्ने समते बताएका छन् ।
आर्थिक रुपले महंगो मानिएको त्यो प्रक्रिया कहिले सुरु गर्ने भन्ने विषयमा थापाले प्रष्ट पारेका छैनन् । अपिल खारेज भएपछि तत्काल फुटबलमा फर्कन थापाको सम्भावना टरेको छ । अब फुटबलमा फर्कने उनका लागि एउटामात्र विकल्प भनेको सिएएसको निर्णय हो । फुटबलमा फर्कन त्यो उनका लागि अन्तिम अस्त्र हो । यहि निर्णय यथावत रहेमा थापा सन् २०२५ सम्म कुनै पनि फुटबल गतिविधिमा संलग्न हुन पाउने छैनन् ।
