काठमाडौं (हाम्रो खेलकुद) – घरेलु फुटबलको सबैभन्दा सफल र चर्चित ‘ए’ डिभिजन क्लब सिग्नेचर मनाङ–मर्स्याङ्दी क्लबको अध्यक्षमा छिमी उर्केन गुरुङ सर्वसम्मत चयन भएका छन् ।

मनाङ समाज सेवा समिति संरक्षक रहेको क्लबको गत बुधबारको साधरणसभाले छिमिको अध्यक्षमा दुई वर्षका लागि १४ सदस्यीय नेतृत्व सर्वसम्मत चयन गरेको हो । कार्यसमितमा १७ सदस्यीय रहने भएपनि तीन सदस्य पछि मनोनित गरिने अध्यक्ष छिमी उर्केन गुरुङले हाम्रो खेलकुदलाई जानकारी गराए ।

प्रथम उपाध्यक्षमा रिन्जेन दोर्जे गुरुङ, उपाध्यक्षमा कर्मा छिरिङ गुरुङ, मुखिया लामा र टासी गुरुङ छन् । महासचिवमा अनिल गुरुङ र सचिवमा छिरिङ टासी घले सर्वसम्मत चयन भए । कोषध्यक्षमा कान्छा गुरुङ र सह–कोषाध्यक्षमा प्रेम बहादुर गुरुङ चयन भए । सदस्यमा तेन्जिङ गुरुङ, अमर गुरुङ, पेम्बा गुरुङ, सोनाम घले र मुखिया गुरुङ चयन भए ।

नया कार्यसमितिले पोखरामा बिहीबारबाट सुरु भएको १७औं संस्करणको आहा रारा गोल्डकपपछि कार्यभार सम्हाल्ने अध्यक्ष गुरुङले जानकारी गराए । ‘बुधबार नयाँ कार्यसमितिको लागि सबै पदमा सर्वसम्मत चयन भएका छन् । हामीले आज हाम्रो संरक्षक मनाङ समाज सेवा समितिलाई नयाँ कार्यसमितिबारे जानकारी गराएका छौं,’ अध्यक्ष गुरुङले भने, ‘कार्यभार ह्यान्डओभर र टेकओभर आहा रारा गोल्डकप पछि हुनेछ । पुरानो कार्यसमिति अहिले मोफसलका प्रतियोगितामा व्यस्त छन् । आहा रारापछि पुराना कार्यसमिति काठमाडौं आएपछि हामी कार्यभार सम्हाल्नेछौं ।’ मोफसलका प्रतियोगितामा पुराना कार्यसमितिले कार्य गरिरहेका कारण केही असहज परिस्थिति नआओस भन्ने हाम्रो चाहना हो ।

यस्तै अध्यक्ष छिमि उर्केन गुरुङले आफ्नो दुई वर्षे कार्यकालमा मनाङलाई राम्रो स्थानमा राखिरहने बताएका । ‘मनाङ अहिले काठमाडौंको मात्रै नभएर नेपालको प्रतिनिधित्व गरेर खेल्न लागेको छ । मुखैमा एएफसी कप छ । यो कपबाट दोस्रो चरण पुग्ने हाम्रो लक्ष्य छ । हामी सबैभन्दा पहिले यसमै केन्द्रित हुनेछौं ।’ उनले भने ।