एजेन्सी – लन्डन क्लब चेल्सीलाई खेलाडी अनुबन्धमा दुई विन्डोको प्रतिबन्ध लागेको छ । विश्व फुटबलको सर्वाेच्च संस्था (फिफा) ले लन्डन क्लब चेल्सीले नियम विपरित विदेशी युवा खेलाडीलाई अनुबन्ध गरेको भन्दै दुई विन्डोको प्रतिबन्ध सुनाएको हो ।
चेल्सीलाई प्रतिबन्धसँगै ४ लाख ६० हजार पाउन्डको जरिवाना पनि सुनाइएको छ । जसमध्ये फुटबल एसोसिएसन (एफए) ले ३ लाख ९० हजार पाउन्ड जरिवाना तोकेको हो । यो प्रतिबन्ध फुकुवा गरिसकेको खेलाडी, महिला फुटबल टिम र फुटसलमा भने लागु हुनेछैन । प्रतिबन्ध सुनाइएपनि चेल्सीलाई अपिल गर्नको लागि ३ दिनको समय दिइएको छ ।
फिफाको अनुसन्धानले चेल्सीले विदेशी युवा खेलाडी अनुबन्ध गर्दा नियम विपरित गरेको पाइएको उल्लेख गरेको छ । फिफाको अनुसन्धानले बुर्किना फासोका १८ वर्षीय बर्टरान्ड ट्राओरेलाई अनुबन्ध गर्दा नियम उंलङ्घन गरेको पाइएको फ्रेन्च वेबसाइट मिडियापार्टले उल्लेख गरेको बेलायती सञ्चारमाध्य बीबीसीले जनाएको छ । नयाँ खेलाडी अनुबन्धनमा प्रतिबन्ध लागेपछि गोन्जालो हिगुआइन सिजनको अन्त्यमा युभेन्ट्स र कोभाचिच रियल म्याड्रिड फर्कने भएका छन् ।
ट्राओरेलाई चेल्सीले फ्रेन्च लिग वान क्लब लियोनबाट सन् २०१३ मा अनुबन्ध गरेको थियो । मिडियापार्टका अनुसार चेल्सीले १४ युवा खेलाडीलाई अनुबन्ध गर्दा नियम उल्लंघन गरेको उल्लेख गरेको छ । यसअघि स्पेनिस क्लब रियल मड्रिड, एट्लेटिको म्याड्रिड र बार्सिलोनालाई पनि खेलाडी अनुबन्ध गर्न प्रतिबन्ध सुनाइएको थियो ।
