काठमदौं (हाम्रो खेलकुद) – अभिषेक रिजालले उच्च लयलाई निरन्तरता दिंदै ह्याट्रिक गरेपछि नेपालले भारतको गुवाहाटीमा जारी डा तालिमेरेन ताओ फुटबल च्याम्पियनसिपमा मणिपुरलाई ३-१ ले पराजित गरेको छ ।
अभिषेकले खेलको १९ औं मिनेटमा अनिल महर्जनको पासमा पहिलो गोल गरेका थिए । ३० औं मिनेटमा एरिक विष्टको कर्नरमा हेडरमार्फत गोल गर्दै अभिषेकले २-० को अग्रता दिलाए । दोस्रो हाफको ५४ औं मिनेटमा मणिपुरका सोंग्पू सिङसितले गोल गर्दै एन्फाको अग्रता घटाए ।
७८ औं मिनेटमा धिरज श्रेष्ठलै मणिपुरका गोलरक्षकले पेनाल्टी क्षेत्रभित्र लडाएपछि नेपालले पेनाल्टी प्राप्त गरेको थियो । मणिपुरका खेलाडीले उक्त निर्णयको विरोध गर्दा खेल केहीबेर रोकिएको थियो । तर अभिषेकले ८२ औं मिनेटमा पेनाल्टीलाई गोलमा परिणत गर्दै ह्याट्रिक पुरा गरे ।
पहिलो खेलमा मेघालयसंग ३-२ ले पराजित नेपालले दोस्रो खेलमा त्रिपुरालै ८-० ले पराजित गरेको थियो । अभिषेकले यसअघिको खेलमा ४ गोल गरेका थिए । नेपालले अर्को खेल आइतबार मिजोरमसंग खेल्नेछ । ६ टोलि सहभागी नेपालको समूहमा नेपालले ३ खेलमा २ जित र १ हार बेहोरेको छ ।
