काठमाडौं (हाम्रो खेलकुद)– अखिल नेपाल फुटबल संघ (एन्फा) का मानार्थ अध्यक्ष टासी घलेले गलत कामको विरोध गर्दा आफुलाई बर्खास्त गर्ने काम भएको बताएका छन् ।

पाटन उच्च अदालतले घलेलाई मानार्थबाट हटाउनुको कारण आदेश जारी गरेपछि पहिलो पटक सोमबार पत्रकार सम्मेलन गर्दै भने,‘ मानार्थ भनेको सम्मान वा पुरस्कार जस्तो । अनि त्यस्तो फिर्ता लिने काम हुन्छ र ? उनले आफुले एन्फाको नयाँ निर्वाचित समितिको गलत कामको सुरुबाटै विरोध गरेको स्मरण गर्दै भने,‘ नवीन पाण्डे विदेशी नागरिक भएकोले फिफा कंग्रेसमा नेपालको प्रतिनिधित्व गराउने विषयमा मैले विरोध गरेकै हो । तर, त्यसमा साथीहरुलाई मेरो भनाई चित्त बुझेन ।’

एन्फा अध्यक्ष कर्मा छिरिङ शेर्पाकै समूहलाई समर्थन गरेका घले मानार्थ अध्यक्षमा दोस्रो पटक मनोनित भएका थिए । तर, केहि समयपछि नै एन्फा नेतृत्वसँग घलेको विवाद सुरु भएको थियो । गत महिना एन्फा कार्यसमितिले घलेलाई बर्खास्त गरेको थियो ।

सञ्चारमाध्यमबाट आफुलाई बर्खास्त गरेको जानकारी पाएको उल्लेख गर्दै घलेले भने,‘ त्यसको विरोधमा मैले अदालत र राष्ट्रिय खेलकुद परिषद्मा उजुरी दिएको हु । यो अन्याय हो । ’ घलेले आफुले एन्फामा गलत कामको सधै विरोध गरेको उल्लेख गर्दै त्यसले गर्दा समय समयमा कित्ता परिवर्तन गर्नुपरेको स्वीकार गरे । यसअघि उनले शेर्पाविरुद्ध एन्फा अध्यक्षमा उम्मेदवारी दिएका नरेन्द्र श्रेष्ठको पक्षमा मत मागेका थिए । २०७३ मा श्रेष्ठ अध्यक्षमा निर्वाचित भएपछि घलेलाई साधारण सभाले मानार्थ अध्यक्षका रुपमा अनुमोदन गरेको थियो ।

यसै वर्ष वैशाखमा भएको निर्वाचनमा भने घले शेर्पा प्यानलको पक्षमा उभिएका थिए । ‘नरेन्द्र श्रेष्ठ पनि लामो समय फुटबलमा काम गरेको राम्रो मान्छे भएकोले मैले साथ दिएको हु । तर उहाँहरुले पनि सोचे जसरी काम गर्न सक्नुभएन,’ घलेले भने,‘ पछि परिवर्तनको नारा दिएका शेर्पा समूहलाई साथ दिए । तर उहाँहरुले पनि राम्रो काम गर्नुभएन । म फुटबलमा लामो समयदेखि छु । म गलत कामको साथ दिन सक्दिन ।’

एन्फा निर्वाचनका बेलामा भएको कुराकानीको अडियो टेप सार्वजनिक भएको विषयमा घलेले छानविनको प्रतिवेदन आफुले पनि कुरिरहेको बताए । ‘अडियो टेप मैले पनि सुने हेरे । त्यसमा आवाज मेरो छ । त्यो सहि हो , त्यसमा मेरो आवाज छ,’ उनले थपे,‘ यो विषयमा छानविन भइरहेको छ । सत्यतथ्य बाहिर आओस् । मेरो गल्ति भए म सजाय भोग्न तयार छु । ’

पछिल्लो समय एन्फाका पूर्व अध्यक्ष गणेश थापासँग नजिएको हो भन्ने प्रश्नको जवाफमा घलेको जवाफ थियो,‘ फुटबलको सबै सँग मेरो राम्रो छ । एन्फा अध्यक्ष शेर्पासँग पनि मेरो केहि नराम्रो छैन । मेरो चाहना फुटबलमा राम्रो काम हुनुपर्दछ भन्ने मात्रै हो ।’

विश्व कपमा हरेक देशलाई जस्तै २ सय ५० टिकट एन्फालाई प्राप्त भएको उल्लेख गर्दै घलेले त्यसको पारदर्शितामाथि भने प्रश्न गरे । ‘मैले पनि सेमिफाइनल र फाइनलको टिकट किन्न खोजेको थिए , तर पाइन,’ उनले भने,‘क कसले त्यो टिकट पायो । त्यसको सबै विषयमा जानकारी दिनुपर्दछ । अहिले सम्म सार्वजनिक भए जस्तो लागेको छैन ।’

घलेले होटल भ्यु भृकुटीमा एक साताको अन्तरमा फरक फरक दर-रेट प्रयोग गरि आर्थिक अनियमितता गरेको आरोप चार जिल्ला फुटबल संघले लगाएको सत्य भएको पनि बताए । ‘यसअघि चार जिल्ला फुटबल संघले रकम हिनामिना गरेको आरोप लगाएका थिए । भ्यु भृकुटी होटलमा एक साताको अन्तरमा फरक रेट प्रस्तुत गर्दै एएफसीबाट रकम निकासा भएको देखिन्छ । चेकबाट हुनुपर्ने कारोबार रकमबाट भएको देखिन्छ । सम्बन्धिक पक्षले निष्पक्ष छानविन गर्नु जरुरि छ,’ उनले भने ।

पत्रकार सम्मेलनको भिडियो :