सुबास हुमागाईं, पोखरा

पछिल्लो समय नेपाली मोफसल फुटबलमा लगातार सफलता हात पारिरहेको दाउफिन्स फुटबल क्लब अझै नेपालमा रहने भएको छ । कुनै प्रतियोगिता खेल्ने निश्चित नहुँदापनि दाउफिन्स नेपालमै रहेर प्रशिक्षण गर्ने टोलीका कप्तानले बताएका हुन् ।

बिहीबार १७ औं आहा रारा गोल्डकपको दोस्रो सेमिफाइनलमा त्रिभुवन आर्मी क्लबसँग १-० ले पराजित हुँदै लगातार चौथो उपाधिबाट दाउफिन्स विमुख भयो । यसअघि पोखरामै भएको मनकामना कप, धरानको बुढासुब्बा गोल्डकप र बुटवलको तिलोत्तोमा गोल्डकपको उपाधि जितेको दाउफिन्सले आहा गोल्डकपमा पनि पुलिसलाई पराजित गर्दै सेमिफाइनलमा स्थान बनाएको थियो ।

आर्मीसँग पराजित भएपछि दाउफिन्सका कप्तान जोसेफ मार्सेल इंगुलाले आहा रारा गोल्डकपमा रेफ्रीको गलत निर्णयले गर्दा पराजित हुनुपरेको बताए । ‘हामीले आजको खेल राम्रो खेल्दाखेल्दै पनि हार्यौं । रेफ्रीको निर्णयमा म एकदम दुखी छु । म यस प्रतियोगिताको व्यवस्थापन र खेलप्रेमी नेपाली समर्थकहरुलाई धन्यवाद दिन चाहन्छु । तर रेफ्रीको प्रदर्शनबाट भने खुसी छैन,’ उनले भने ।

आर्मीविरुद्ध निकै प्रतिस्पर्धात्मक खेलमा रेफ्री सुदिश पाण्डेले दाउफिन्सका एक खेलाडीलाई दोहोरो पहेंलो कार्ड देखाएका थिए । खेलको अन्तिम समयमा रेफ्रीसँग विवाद गरेको भन्दै पाण्डेले कप्तान जोसेफलाई पनि पहेंलो कार्ड देखाएका थिए । यसबाहेक खेलदौरान पनि रेफ्रीको निर्णय एकपक्षीय भएको भन्दै दाउफिन्सका खेलाडी रुष्ट देखिएका थिए ।

जोसेफले नेपालका अन्य प्रतियोगितामा पनि सहभागिता जनाउने तयारी रहेको बताए । ‘हामी अझै अन्य प्रतियोगिता खेल्ने तयारीमा छौं । अहिलेसम्म यहि खेल्ने भन्ने यकिन भएको छैन । तर हामी अब प्रशिक्षणमा थप मिहिनेत गरेर अन्य प्रतियोगितामा सहभागिता जनाउन तयार छौं,’ उनले थपे ।

दाउफिन्स क्यामरुनको स्थानीय स्तरमा खेल्ने टोली रहेको कप्तान जोसेफले बताएपनि कुन श्रेणीमा खेल्ने भन्ने प्रश्नमा उनले स्पष्ट जवाफ दिएनन् । उनले आफ्नो टोलीको क्यामरुन फर्कने कुनै मनस्थिति नरहेको र अझै नेपालमा रहेर खेल्ने पनि बताए । धनगढीको खप्तड गोल्डकप खेल्न नेपाल आएको दाउफिन्सले त्यसयता लगातार मोफसलका प्रतियोगिताहरुमा खेल्दै आएको छ । सुरुवाती दुई प्रतियोगितामा पहिलो खेलमा पराजित दाउफिन्सले त्यसपछि भने लगातार तीन उपाधि जितेको थियो ।

यो पनि : ‘दाउफिन्सलाई मान्यता दिएका छैनौं’ – एन्फा अध्यक्ष शेर्पा