बिर्तामोड (हाम्रो खेलकुद) – कप्तान कर्ण लिम्बूको निर्णायक गोलमा आयोजक मग मग झापा ११ फुटबल क्लब मगमग झापा गोल्डकपको सेमिफाइनलमा प्रवेश गरेको छ । पाहुना टोली हङकङ नेप्लिज एकेडेमीलाई १–० ले पराजित गर्दै झापाले अन्तिम चारमा स्थान पक्का गर्यो ।
डोमालाल रंगशालामा सोमबार भएको खेलमा झापा ११ का कप्तान कर्णले ४१औं मिनेटमा गरेको गोल निर्णायक बन्यो । निशान खड्काको क्रसमा कर्णले हेडरमार्फत गोल गर्दै झापालाई अग्रता दिलाए । खेल अवधिभर झापाले गोल गर्ने थुप्रै अवसर गुमाएको थियो । खेलको अाठौं मिनेटमा सञ्जोग राईको क्रस पासमा कर्ण लिम्बूले गरेको हेडर पोष्ट नजिकैबाट बाहिरियो । त्यसको एक मिनेटपछि झापाका लागि विदेशी खेलाडी फ्रान्सिस ओनियमाको पासमा कर्णले गोल गर्न सकेनन् । उनको प्रहार बार नजिकैबाट बाहिरिँदा अग्रता लिने अवसर गुमेको थियो ।
११औं मिनेटमा योगेश गुरुङले खाली पोष्टमा गोल गर्न सकेनन् । २५औं मिनेटमा कर्णले हङकङका गोलरक्षक अभिजित रोयसँग वान भर्सेस वानमा पनि गोल गर्न सकेनन् । उनको कडा प्रहार गोलरक्षक रोयले फर्काउँदा झापाली समर्थक निरास हुनुपरेको थियो ।
हङकङले पहिलो हाफमा दबाब बनाउन नसकेपनि दोस्रो हाफमा अाक्रमण गुमेको थियो । ५४अौं मिनेटमा हङकङका सानोजेको प्रहार पोष्टभन्दा केही माथिबाट बाहिरियो । ६४औं मिनेटमा मोहम्मद डुम्बियाले खाली पोष्टमा गोल गर्न सकेनन् । गोलकिपर दिनेश थापामगर बिट भइसकेको अवस्थामा उनले गरेको प्रहारले पोस्टको दिशा लिन नसक्दा हङकङ निराश भएको थियो ।
खेलको इन्ज्युरी समयमा हङकङका दिपेश मोक्तानले गोलकिपर थापामगरसँग वान भर्सेस वानमा गोल गर्न सकेनन् । उनको प्रहार झापाका गोलकिपर दिनेशले बचाउँदा झापाको जित पक्का भएको थियो । खेलको म्यान अफ दी म्याच विजेता टिम मग मग झापा ११ का निशान्त खड्का घोषित भए । उनले १५ हजार रुपैंयाँ पुरस्कार पाए ।
मंगलबारको खेल सशस्त्र प्रहरीको एपीएफ क्लब र त्रिभुवन आर्मी क्लबबीच हुने आयोजक समितिका सचिवालय संयोजक गजेन्द्र पौडेलले जानकारी दिए । जितपछि झापाका प्रशिक्षक प्रवेश कटवालले ६ जना विदेशी खेलाडी सहभागी टिमसँग खेल्नु पर्दा झापाका खेलाडीले दबाब महसुस गरेको बताए । हङकङका म्यानेजर नविन राईले तालमेलको अभावमा स्कोर हुन नसकेको बताए ।
