एजेन्सी – पेरिस सेन्ट जर्मेन (पीएसजी) बुधबार भएको च्याम्पियन्स लिगको प्रि-क्वाटरफाइनलको चरणको दोस्रो लेगमा म्यानचेस्टर युनाइटेडसँग पराजित हुँदै बाहिरियो । यससँगै पीएसजीको युरोपेली प्रतियोगितामा दावेदारी प्रस्तुत गर्ने सपना चकनाचुर भयो ।

किलियन एमबाप्पे र नेयमारले पछिल्लो समय पीएसजीलाई युरोपको ठूलो टोलीका रुपमा स्थापित गर्न च्याम्पियन्स लिगमा राम्रो नतिजा ल्याउने बताएका थिए । तर लगातार अर्को सिजन पीएसजी अप्रत्याशित हार बेहोर्दै प्रतियोगिताबाट बाहिरिन बाध्य भयो । यसले स्टार खेलाडीले पीएसजी छाड्ने सम्भावना पनि बलियो भएको छ ।

रियल म्याड्रिडले पछिल्लो समय नेयमार र एमबाप्पेलाई आफ्नो मुख्य खेलाडीको रुपमा पहिचान गरेको छ । अघिल्लो सिजन नेयमारलाई खरिद गर्न औपचारिक प्रस्ताव राखेको म्याड्रिडले दुई सिजन अगाडी मोनाकोलाई एमबाप्पेको लागि विश्व कीर्तिमान रकम प्रस्ताव गरेको थियो । दुवै प्रस्ताव असफल हुँदा रियलले नयाँ स्तरीय खेलाडी भित्र्याउन सकेन । जसकारण क्लबले पछिल्लो समय निकै खराब प्रदर्शन गरिरहेको छ ।

पीएसजीले नेयमार र एमबाप्पेलाई क्लबमा भित्र्याउन ४ सय मिलियन युरो खर्चेपनि क्लबलाई च्याम्पियन्स लिगको अन्तिम १६ चरण पार गराउन सकेको छैन । पीएसजीले पनि यसकारण टोलीलाई नयाँ पथमा लाग्ने प्रयास सुरु गर्ने सम्भावना रहेको छ । नेयमारले पनि पछिल्लो समय रियल म्याड्रिडको प्रशंसा गर्दै आएका छन् । उनले पेरिसमा आफू खुसी भएपनि भविष्यको बारेमा अहिले केहि बोल्न नसक्ने बताएका थिए ।