एजेन्सी – स्पेनिस क्लब बार्सिलोना तथा अर्जेन्टिनाका कप्तान लियोनेल मेस्सी राष्ट्रिय टोलीमा फर्किएका छन् । मेस्सी ९ महिनापछि अर्जेन्टिनाको राष्ट्रिय टोलीमा फर्किएका हुन् ।

मेस्सी गत जुन-जुलाईमा रसियमा भएको विश्वकपपछि राष्ट्रिय टिममा अनुपस्थित रहँदै आएका थिए । रसिया विश्वकपमा जर्ज साम्पोलीको प्रशिक्षणमा अर्जेन्टिनाले मुस्किलले प्रि–क्वाटरफाइनलको यात्रा तय गरेको थियो । प्रि–क्वाटरफाइनलमा अर्जेन्टिना फ्रान्ससँग पराजित भएको थियो । त्यसपछि मेस्सीले राष्ट्रिय टिमबाट खेल्न छाडेका थिए ।

नयाँ प्रशिक्षक लियोनेल स्कालोनीले कप्तान मेस्सीलाई भेनेजुएला र मोरोक्कोविरुद्धको खेलका लागि टिममा बोलाउन सफल भएका हुन् । अर्जेन्टिनाले २२ मार्चमा स्पेनमा भेनेजुएलासँग खेल्दैछ । त्यसको चार दिनपछि मोरोक्कोसँग मैत्रीपुर्ण खेल खेल्ने तालिका छ ।

लियोनेल स्कालोनीको टिममा मेस्सी समावेश हुँदा म्यानचेस्टर सिटीका फरवार्ड सर्जियो अगुएरो, लोनमा चेल्सीबाट खेलिरहेका गोन्जलो हिगुआइन र इन्टर मिलानका फरवार्ड मौरो इकार्डीले टिममा स्थान बनाउन सकेनन् । प्रशिक्षक स्कालोनीले लौउटारो मार्टिनेज, जियोभानी सिमिओनी र डारियो बेनेडेटोलाई टिममा समावेश गरेका छन् ।