एजेन्सी – यूईएफए युरोपा लिग अन्तर्गत प्रि क्वाटरफाइनलको पहिलो लेगमा आर्सनल फ्रान्सेली क्लब रेन्नेससँग ३-१ ले पराजित भएको छ ।
रेन्नेसको घरेलु मैदानमा आर्सनलले सुरुवाती अग्रता लिएको थियो । चौथो मिनेटमा एलेक्स इअोबीले गोल गर्दै पाहुना टोलीलाई अगाडी बढाए । तर पहिलो हाफको चार मिनेट बाँकी रहँदा आर्सनल १० खेलाडीमा सिमित भयो । सोक्राटिस पापास्थापोपोउलस दोहोरो पहेंलो कार्ड खाँदै बाहिरिएलगत्तै रेन्नेसले बराबरी गोल फर्कायो । बैरिगाउडले खेल बराबरीमा ल्याए ।
दोस्रो हाफमा रेन्नेसले अग्रता लियो । ६५ अौं मिनेटमा नाचो मोनरियालले आत्मघाती गोल गरेपछि घरेलु टोली अगाडी बढेको थियो । खेलको दुई मिनेट समय बाँकी रहँदा रेन्नेसले अग्रता दोब्बर पार्यो । जेम्स सिल्किको पासमा इस्माइला सारले गोल गर्दै रेन्नेसको जित पक्का गरे ।
दोस्रो लेगको खेल अर्को बिहीबार आर्सनलको घरेलु मैदान एमिरेट्स रंगशालामा हुनेछ ।
