टुरिन (एजेन्सी) – स्टार खेलाडी क्रिस्टियानो रोनाल्डोको ह्याट्रिकसंगै युभेन्टसले एट्लेटिको म्याड्रिडलाई अन्तिम १६ को दोस्रो लेगमा ३-० ले पराजित गर्दै समग्रमा ३-२ को जित हात पारेको छ । पहिलो लेगमा एट्लेटिको २-० ले विजयी भएको थियो ।
खेलको २७ औं मिनेटमा उत्कृष्ट हेडिङ गोल गर्दै रोनाल्डोले घरेलु मैदानमा आफ्नो टोलीलाई अग्रता दिलाए । त्यस्तै खेलको ४८ औं मिनेटमा पुन: हेडिङ गोल गर्दै रोनाल्डोले टोलीको अग्रता दोब्बर बनाउंदै समग्रमा २-२ को नतिजासम्म पुर्याए ।
खेलको ८५ औं मिनेटमा फेडेरिको बर्नाडेस्कीमाथि डिबक्समा फाउल हुंदा युभेन्टसले पेनाल्टी पाएको थियो । सो पेनाल्टीमा रोनाल्डोले गोलकिपर जान ओब्लाकलाई विपरित दिशातर्फ पठाउंदै आफ्नो ह्याट्रिक तथा टोलीको उत्कृष्ट पुनरागमन सुनिश्चित गरेका हुन् ।
यस नतिजासंगै युभेन्टस च्याम्पियन्स लिगको क्वाटरफाइनलमा पुग्न सफल भएको छ भने एट्लेटिको म्याड्रिड प्रतियोगिताबाट बाहिरिएको छ ।
अर्को खेलमा इंग्लिस प्रिमियर लिग टोली म्यानचेस्टर सिटीले जर्मनीको साल्केलाई ७-० ले हराउंदै समग्रमा १०-२ को जित दर्ता गर्दै अन्तिम ८ मा स्थान सुरक्षित गरेको छ । यस अघि आयाक्स, म्यानचेस्टर युनाइटेड, पोर्टो र टोटनह्याम छनोट भइसकेका छन् ।
