default_image

5 years ago

March 14, 2019

चोट, संघर्ष अनि डेब्युको खुसी

419 views

0 Bookmark

सुबास हुमागाईं, विराटनगर

खेलाडीको जीवनमा चोटका कारण मैदानबाहिर बस्नुजस्तो पिडादायी क्षण सायदै अरु केहि होला । कुनैपनि हारको नतिजामा पिडा हुन्छ तर त्यसलाई बिर्साउन खेलाडीले अर्को मौका पाउँछ । चोट लागेर मैदानबाहिर बस्दा हुने पिडालाई जित्न सुखद पुनरागमनको विकल्प हुँदैन ।

चोटको पिडाले खेलाडीलाई शारीरिक रुपमा त कमजोर बनाउँछ नै मानसिक रुपमा त्योभन्दा बढी हानी गर्छ । कमै खेलाडीले छोटो समयमा चोटबाट सफल पुनरागमन गर्न सक्छन । स्थापित खेलाडीको लागि यो प्रक्रिया सहज हुन्छ तर युवा खेलाडीको लागि आफ्नै पिडालाई जित्नु निकै कठिन हुने गर्छ । तर यो सबैलाई चिर्दै नेपाली महिला राष्ट्रिय टोलीकी युवा फरवार्ड रेखा पौडेलले राष्ट्रिय टोलीमा स्थान बनाइन् र डेब्यु पनि गरिन् ।

मिति सन् २०१६, नोभेम्बर २२

एक महिनापछि भारतमा सुरु हुने साफ च्याम्पियनसिपको लागि एन्फा कम्प्लेक्समा अवस्थित एष्ट्रो टर्फ मैदानमा राष्ट्रिय टोलीको अन्तिम चरणको छनोट जोडतोडले चलिरहेको थियो । मुख्य प्रशिक्षक कुमार थापा, प्रशिक्षक अस्मिता खवास र टेक्निकल डाइरेक्टर चियाकी ताकेदासहितको प्राविधिक टोली खेलाडी नामावलीसहित मैदानको छेवैमा छलफल गरिरेहका थिए । छनोटको अन्तिम मैत्रीपूर्ण खेल समाप्त भएको संकेत गर्न प्रशिक्षक थापाले सिट्ठी फुक्ने तयारी गर्दै थिए ।

खेल सकिन केहि समय बाँकी रहँदा फरवार्ड रेखा पौडेल मैदानको बीच भागमा लडीन् । मैदानबाहिर रहेकी टोलीकी फिजियो भूमिका कायस्थ ‘आइसप्याक’ बोक्दै त्यसतर्फ दगुरिन् । केहिबेरमा थाहा भयो डिफेन्डर अन्चली वाइबाले प्रहार गरेको बल रेखाको हातमा लागेको थियो । रेखाको पिडा र उनको हातको स्थिति हेर्दा फिजियोलाई उनको हात भाँचिएको एकिन गर्न लामो समय लागेन । विस्तृत परिक्षणपछि उनको राष्ट्रिय टोलीमा पहिलोपटक छनोट हुने सपना त्यसबेला पूरा हुन नसक्ने निष्कर्ष आयो ।

सन् २०१६ मा प्रशिक्षणका दौरान चोट बोकेपछि निराश मुद्रामा रेखा पौडेल

त्यसबेला नवनियुक्त प्रशिक्षक कुमार थापाको नेतृत्वमा नेपाली टोलीले भारतको सिलिगुडीमा हुने प्रतियोगिताका लागि केहि साताअघि नै तीव्र गतिमा तयारी अगाडी बढाएको थियो । प्रारम्भिक चरणमा ७२ खेलाडी उपस्थित भएपछि थापाले तीन चरणको छनोटपछि ३३ खेलाडीको नाम छनोट गरे । त्यसपछि अर्को चरण टोलीको छनोट गर्न आयोजित मैत्रीपूर्ण खेलमा फरवार्ड रेखा पौडेलले चोट बोकिन् । दुर्भाग्यपूर्ण चोट बोक्नुपर्दा रेखाको टोलीमा पुग्ने बलियो सम्भावनाले मुर्तरुप लिन सकेन ।

उनै रेखा पौडेलले यहि मंगलबार साफ महिला च्याम्पियनसिपको उद्घाटन खेलमा भुटानविरुद्ध राष्ट्रिय टोलीबाट डेब्यु गरिन् । उमेर समूहको प्रतियोगितामा लगातार आफूलाई प्रमाणित गर्दै आएकी रेखाको लागि यो दिनको लागि निकै प्रतिक्षा गर्नुपर्यो । सन् २०१४ मा श्रीलंका र सन् २०१५ मा नेपालमा आयोजित एएफसी यू-१४ गर्ल्स रिजनल च्याम्पियनसिपमा रेखाले लगातार गोल गर्दै उमेर समूहको फुटबलमा स्थापित गराएकी थिइन् ।

सन् २०१५ मा श्रीलंकाविरुद्ध गोल गर्ने प्रयासमा रेखा पौडेल

प्रतियोगिताको फाइनल खेलको दिन महाभूकम्प आएपछि उक्त फाइनल केहि महिनाको लागि स्थगित भएको थियो । स्थगित भएको फाइनलमा उपविजेतामै सिमित भएपनि रेखाको लागि भने उक्त प्रतियोगिता नेपाली समर्थकमाझ आफ्नो सुरुवाती परिचय बनाउन पर्याप्त रहयो । उक्त प्रतियोगितामा खेलेका अधिकांश खेलाडी हाल यू-१९ राष्ट्रिय टोलीमा पनि छन् । कहिले विभागीय टोलीबाट खेल्दै राष्ट्रिय टोलीसम्म यात्रा तय गरेका छन् ।

फरवार्ड रेखाले उक्त प्रतियोगितापछि सिनियर स्तरको महिला लिगमा पुर्वान्चलबाट आक्रमण सम्हाल्दै आफ्नो क्षमता देखाइन् । उमेर समूहको टोलीमा रहेकी आक्रामक मिडफिल्डर सरु लिम्बूको साथमा उनले पुर्वान्चलका लागि राम्रो प्रदर्शन गरेपछि दुवै खेलाडी लगत्तै विभागीय टोली एपीएफमा होमिए । राष्ट्रिय खेलाडीले भरिपूर्ण एपीएफमा दुवै खेलाडीले खेल समयका लागि केहि समय कसरत गर्नुपर्यो ।

महिला लिगमा पूर्वान्चलबाट खेल्दै रेखा (नीलो)

लिग र प्रधानसेनापति कपमा गरेको धेरथोर प्रदर्शनका आधारमा रेखा र सरु दुवै राष्ट्रिय टोलीको प्रारम्भिक छनोटमा परे । तर छनोटमा प्रभावशाली प्रदर्शन गर्नका बाबजुद चोटले उनको टोलीमा पर्ने सम्भावनामा पूर्णविराम लगायो । सरुले भने राष्ट्रिय टोलीमा पर्दै डेब्यु पनि गरिन् । त्यसयता सरुले राष्ट्रिय टोलीबाट १३ खेल खेलिसकेकी छिन् ।

बिरलै आउने अवसरमा चोट बोकेपछि रेखालाई मैदानमा फर्कन निकै समय कुर्नुपर्यो । नियमित महिला फुटबल नहुनुले उनलाई आफूलाई सिद्ध गर्न अवसरको आवश्यकता थियो । महिला लिग र प्रधानसेनापति कपमा सिमित नेपालको घरेलु फुटबलले उनलाई एपीएफमा सिद्ध पार्न पर्याप्त अवसर दिएन । राष्ट्रिय टोलीका खेलाडीले भरिपूर्ण एपीएफमा उनले कडा मिहिनेत भने जारि राखिन् । धेरथोर खेल्ने समय पाउँदा आफ्नो स्तर देखाई नै रहिन् ।

उमेर समूहको यू-१९ प्रतियोगितामा नेपालले पहिलो पटक सहभागिता जनाउनु उनको लागि अवसर बनेर आयो । एएफसी यू-१९ च्याम्पियनसिपको छनोट खेल्नुअघि नेपालले दक्षिण एसियाली स्तरको साफ यू-१८ महिला च्याम्पियनसिप खेल्ने भयो । साफ प्रतियोगितामा नेपाल फाइनलमा बंगलादेशसँग १-० ले पराजित भयो । भुटानमा भएको प्रतियोगिता अवधिभर ८ गोल गर्दै रेखाले सर्वाधिक गोलकर्ताको उपाधि जितिन् ।

उक्त लयलाई रेखाले एएफसी स्तरमा पनि कायम राखिन् । पहिलो खेलमा थाइल्यान्डसँग पराजित भएपछि भारतविरुद्ध दोस्रो खेलमा २-० को जितमा दुवै गोल गरेकी रेखाले दुवै खेलमा पहेंलो कार्ड पाएकाले तेस्रो खेल भने गुमाइन् । तर कमजोर पाकिस्तानमाथि रेखाको अनुपस्थितिमा नै नेपाल ९-० को फराकिलो जित दर्ता गर्दै दोस्रो चरणमा स्थान बनायो । उक्त प्रतियोगिताको दोस्रो चरण अप्रिल अन्तिम साता म्यानमारमा हुँदैछ । नेपालको समूहमा आयोजक म्यानमारसँगै अष्ट्रेलिया र उज्बेकिस्तान रहेका छन् ।

रेखाले राष्ट्रिय टोलीबाट डेब्यु गर्दाको क्षणमा आफ्नो सपना पूरा भएको अनुभूति गरिन् । ‘डेब्यु गर्दा एकदम खुसी लाग्यो । घरेलु मैदानमा भएको साफको उद्घाटन खेलमा डेब्यु गर्न पाउनु अझ विशेष रहयो । मैदानभित्र छिर्दाको क्षणमा आफ्नो सपना पुरा भएजस्तो लाग्यो । मेरो यो खुसी दिवंगत आमाप्रति समर्पण गर्न चाहन्छु,’ रेखाले भनिन् ।

भुटानविरुद्ध राष्ट्रिय टोलीको जर्सीमा रेखा

१७ वर्षीय रेखाले खेलको अन्तिम समयमा मैदान प्रवेश गरेपनि छिरेको केहि सेकेन्डमै आफ्नो प्रकृति अनुसार प्रदर्शन गरेकी थिइन् । शारीरिक रुपमा निकै छरितो रेखा प्राविधिक रुपमा पनि उत्तिकै राम्रो रहेको टोलीका मुख्य प्रशिक्षक हरि खड्का बताउँछन् । ‘ प्रशिक्षणमा रेखाको प्रदर्शन र मिहिनेतको कारण नै उनले राष्ट्रिय टोलीमा स्थान बनाएकी हुन् । भुटानविरुद्ध निकै कम समय पाएपनि उनले आफ्नो प्रयास गरिन् । अझै खेल्ने समय पाएको खण्डमा उनले आफ्नो स्तर देखाउनेमा विश्वस्त छु,’ खड्काले थपे,’ उनी उदीयमान खेलाडी हुन् । उनको खेलको स्तर देखेर नै यहाँ ल्याएका छौं । एउटा फरवार्डमा हुनुपर्ने छरितोपन र सहि स्थानमा पुग्ने प्रकृतिका कारण नेपाली फुटबलले भविष्यमा राम्रो फरवार्ड पाउने अपेक्षा मैले गरेको छु ।’

रेखाले पनि अवसर पाएको खण्डमा त्यसलाई सदुपयोग गर्न तत्पर रहेको बताइन् । ‘मैले आफ्नो सक्दो प्रयास गरिरहेको छु । प्रशिक्षकले मलाई विश्वास गर्नुहुन्छ भने मैले वहाँको योजनामा सिद्ध पार्ने हर प्रयास गर्नेछु,’ उनले भनिन् ।

चोटका कारण पछिल्लोपटक छनोटमा सहभागी हुन नपाएको इख राखेर यहाँसम्म आइपुगेको रेखा बताउँछिन् । ‘पछिल्लोपटक छनोटका दौरान चोट बोक्दा मैले बिचमा छाडेर जानुपर्यो । मैले राष्ट्रिय टोलीमा पर्छु भन्ने इख राखेको थिएँ । आफ्नो स्तरवृद्धि गर्न थप मिहिनेत गरें र अहिले त्यसको फलस्वरुप नै यहाँसम्म आइपुगेको छु,’ उनले थपिन्, ‘जस्तोसुकै परिस्थितिमा पनि डटेर लडेपछि नै यहाँसम्म आइपुग्न सकें । क्लबमा पनि प्रशिक्षक र अन्य सिनियर खेलाडीको साथ पाएँ ।’ केहि पारिवारिक समस्या भएपनि उनले त्यसलाई कहिल्यै आफ्नो खेल जीवनमा बाधा पुर्याउन दिइनन् । खेलप्रति उनको लगाव र नजिकका साथी र प्रशिक्षकको प्रेरणाले उनलाई अगाडी बढ्न मदत गरिरह्यो ।

डेब्यु खेलमा मैदान प्रवेश गर्ने क्रममा रेखा पौडेल

सिनियर खेलाडीभन्दा माथि रहेर अन्तिम टोलीमा स्थान बनाउन रेखालाई सहज भने थिएन । तर उनले ती खेलाडीसँग प्रतिस्पर्धा गरेर अन्तत: सिनियर टोलीमा आफ्नो स्थान बनाइन् । ‘राष्ट्रिय टोलीमा सिनियर दिदीहरु हुनुहुन्थ्यो । वहाँहरुसँग प्रशिक्षण गर्दा धेरै कुरा सिक्न पाएँ र सुधार गर्ने ठाउँ पनि थाहा भयो । अहिले एकै टिमबाट खेल्ने अवसर पाउँदा निकै खुसी छु,’ उनले भनिन् ।

राष्ट्रिय टोलीमा बटुलेको अनुभवलाई उनी उमेर समूहको प्रतियोगितामा प्रयोग गर्ने बताउँछिन् । उनले राष्ट्रिय टोलीमा बलियो आत्मविश्वास र खेल्ने शैलीमा थप सुधार गरेकी छिन् । यसले व्यक्तिगत रुपमा मात्र नभएर टोलीलाई नै फाइदा हुने उनको जिकिर छ । त्यसअघि उनले आफ्नो नजर साफ च्याम्पियनसिपको उपाधिमा राखेकी छिन् । रेखाले भनिन्, ‘हामी सबैको लक्ष्य अहिले मात्र साफ च्याम्पियनसिपमा रहेको छ । हामीले जसरी पनि यो उपाधि जित्नुपर्छ । घरेलु मैदानमा साफ उपाधि जितेर सारा नेपालीलाई खुसी बनाउने हाम्रो लक्ष्य रहेको छ ।

July 26, 2024

अन्जनको ह्याट्रिकमा चर्च ब्वाइज विजयी

काठमाडौं (हाम्रो खेलकुद) – एएफसी च्यालेन्ज लिग प्लेअफको तयारी गरिरहेको अपि पावर चर्च ब्वाइज युनाइटेडले मैत्रीपूर्ण खेलमा त्रिभुवन आर्मी फुटबल क्लबलाई पराजित गरेको छ । अर्को साताबाट भारतमा सुरु हुने डुरान्ड कपको तयारी गरिरहेको आर्मीको भद्रकाली स्थित मुख्यालयको फुटबल मैदानमा खेलिएको खेलमा पाहुना टोली ३-२ ले विजयी रह्यो । चर्च ब्वाइजका लागि फरवार्ड अन्जनले दुई […]

July 26, 2024

चितवन जिल्ला लिगमा  सौराहा र पानसको जित

सुशिल पन्त क्षेत्री,चितवन सेन्ट्रल कलेज चितवन जिल्ला ए डिभिजन लिग फुटबलमा शुक्रबार सौराहा युवा समाज र पानस युवा क्लब विजयी भएका छन् । शारदानगरको मैदानमा पहिलो खेलमा सौराहाले गीतानगर ब्वाइजलाई ३-१ ले हरायो । खेलमा सौराहालाई जिताउन सुशील घलानले ३५ औं र ५२ औं मिनेटमा गोल गरे । यस्तै लक्की गायकले २७ औं मिनेटमा गोल […]

July 26, 2024

सातदोबाटो र पुलिसको जित

काठमाडौं (हाम्रो खेलकुद) – ललित स्मृति यु-१८ लिग अन्तर्गत शुक्रवार भएका खेलमा सातदोबाटो युथ क्लब र नेपाल पुलिस क्लब विजयी भएका छन् । एन्फा कम्प्लेक्स सातदोबाटमा भएको दिनको पहिलो खेलमा सातदोबाटोले मनाङ मर्स्याङ्दी क्लब माथि २-० को जित दर्ता गरेको हो । सातदोबाटोका लागि सोनाम छिरिङ गुरुङ र प्रज्वल कार्कीले समान १-१ गोल गरे । […]

Success

Thank you for your time.