एजेन्सी – रुसमा गतवर्ष सम्पन्न फिफा विश्वकप २०१८ यता पहिलो पटक क्रिस्टियानो रोनाल्डो राष्ट्रिय टोलीमा फर्किएका छन् । युरोपियन कप अन्तर्गतको छनोट खेलका लागि रोनाल्डो फर्नान्डो सान्तोसको पोर्चुगिज टोलीमा अटाएका हुन् ।
युक्रेन र सर्विया विरुद्धको खेलका लागि प्रशिक्षक सान्तोसले उनालाई टोलीमा समावेश गरेका हुन् । पोर्चुगलले मार्च २२ मा युक्रेन र २५ मा सर्बियाको सामना गर्नेछ ।
रोनाल्डोले पछिल्लो पटक विश्वकपको अन्तिम १६ मा उरुग्वे विरुद्ध खेलेयता पोर्चुगलका लागि कुनै खेल खेलेका छैनन् । पोर्चुगल उक्त खेलमा २-१ ले पराजित भएको थियो । रोनाल्डो पोर्चुगल टोलीमा सर्वाधिक अनुभवी खेलाडी हुन् । उनले १ सय ५४ खेलमा पोर्चुगलका लागि ८५ गोल गरेका छन् ।
रियल म्याड्रिडबाट यसै सिजन युभेन्टस पुगेका रोनाल्डोले इटालियन क्लब युभेन्टसमा आफ्नो ध्यान केन्द्रित गर्न राष्ट्र टोलीबाट विश्राम लिएको बुझिएको थियो । रोनाल्डोले यो सिजन युभेन्टसबाट ३६ खेलमा २४ गोल गरि सकेका छन् । उनकै ह्याट्रिकको मद्दतले युभेन्टस च्याम्पियन लिग क्वाटर फाइनलमा स्थान बनाउन सफल भएको थियो ।
