एजेन्सी – प्रशिक्षक जिनेदिन जिदान प्रशिक्षकका रुपमा पुनरागमन गरेपछि पहिलो खेलमा रियल म्याड्रिडले सेल्टा भिगोलाई २-० ले पराजित गरेको छ ।
स्पेनिस ला लिगा अन्तर्गत शनिबार रियलले मिडफिल्डर इस्कोको गोलमा अग्रता लिएको थियो । अघिल्ला प्रशिक्षक सान्टियागो सोलारीले बेवास्ता गरेका इस्कोले ६२ अौं मिनेटमा खाता खोलेका थिए । उनले करीम बेन्जेमाको क्रसलाई सदुपयोग गरेका थिए ।
खेल सकिन १३ मिनेट समय बाँकी रहँदा ग्यारेथ बेलले म्याड्रिडको जित पक्का गरे । उनको शक्तिशाली प्रहार पोस्टमा लाग्दै गोल हुन पुगेको थियो । यस जितसँगै रियलले दोस्रो स्थानको एट्लेटिको म्याड्रिडमाथि दवाव सिर्जना गरेको छ ।
रियलको २८ खेलमा ५४ अंक छ । एट्लेटिकोको समान खेलमा ५६ अंक रहेको छ । शीर्षस्थानको बार्सिलोनाले २७ खेलमा ६३ अंक जोडेको छ ।
