विराटनगर (हाम्रो खेलकुद) – नेपाली महिला राष्ट्रिय फुटबल टोलीले विराटनगरमा जारी पाँचौ साफ महिला च्याम्पियनसिपको सेमिफाइनलमा बुधबार श्रीलंकाको सामना गर्दैछ । खेल विहान ११ बजे शहिद रंगशालामा हुनेछ ।

खेलको पूर्वसन्ध्यामा बोल्दै टोलीका प्रशिक्षक हरि खड्काले सेमिफाइनलको लागि टोली पूर्ण रुपमा तयार रहेको बताए । ‘हामी प्रतियोगिताको सेमिफाइनल खेल्दैछौं । टोली शारीरिक र मानसिक रुपमा तयार छ । श्रीलंकाभन्दा हामी बलियो नै छौं तर प्रशिक्षणमा तयार गरेको रणनीतिलाई प्रयोग गर्दै फाइनल यात्रा तय गर्ने लक्ष्य राखेका छौं,’ उनले भने ।

प्रशिक्षक खड्काले नेपाल बलियो भएपनि श्रीलंकालाई सहज रुपमा भने नलिएको बताए । ‘श्रीलंकाभन्दा हामी राम्रो टोली हौं । भारतले ५ गोल खाएको छ तर हामीले आफूलाई उपाधि दावेदारको रुपमा प्रस्तुत गरिरहँदा श्रीलंकाले केहि रक्षात्मक रणनीति अपनाउने अपेक्षा गरेको छु । त्यसको लागि पनि हामी तयार नै छौं,’ उनले भने, ‘ टोलीमा केहि परिवर्तन हुने वा नहुने अहिले भन्न सक्ने अवस्था छैन ।’

प्रशिक्षक खड्काले फाइनल पुग्दा राम्रो प्रदर्शन गर्दै कुनै गोल नखाने लक्ष्य राखेको बताए । ‘ स्कोर यति गर्ने तोक्नु भन्दापनि कुनै गोल नखाने हाम्रो लक्ष्य छ । राम्रो फुटबल खेल्ने र जित हासिल गर्दै फाइनलमा स्थान पक्का गर्ने सोच रहेको छ,’ उनले थपे, ‘ फाइनल पुग्नेभन्दा सेमिफाइनलमा नै ध्यान दिएका छौं । फुटबल हो, कहिलेकहीं नतिजा उल्टिन पनि सक्छ । हामीले होसियार भएर, आफ्नो रणनीति अनुसार खेल्नेछौं । शारीरिक रुपमा श्रीलंका बलियो रहेकाले हामीले एकल प्रयासभन्दा टोलीको योजनाअनुसार खेल्नेछौं ।’

नेपाल र श्रीलंकाली हालसम्म ५ पटक एकआपसमा खेलेका छन् । सबै खेलमा नेपालले नै जित दर्ता गरको छ । पछिल्लोपटक नेपाल र श्रीलंकाको भेट भारतको सिलिगुडीमा भएको चौथो साफ च्याम्पियनसिपको समूह चरणको खेलमा भएको थियो जसमा नेपाल १-० ले विजयी रहेको थियो ।

खेलमा नेपालले विपक्षी श्रीलंकालाई कमजोर रुपमा नलिएको कप्तान निरु थापाले बताएकी छिन् । ‘ हामीले श्रीलंकालाई कमजोर रुपमा लिएका छैनौं । खेलअघि नै डोमिनेट गर्न खोज्दा मैदानमा प्रदर्शन बिग्रन सक्छ,’ उनले भनिन्, ‘ विगतको तुलनामा श्रीलंकाको आक्रमण र मिडफिल्ड केहि सुधारिएको पाएका छौं । हामी जितको लक्ष्य लिएर नै मैदान उत्रनेछौं ।’

कप्तान थापाका अनुसार नेपालको आक्रमण र डिफेन्स पछिल्लो समय केहि बलियो देखिएको छ । ‘हाम्रो आक्रमण र डिफेन्स बलियो पाटो हो । मिडफिल्डमा भने केहि सुधार हुन सक्छ । मिडफिल्डबाट आक्रमणमा राम्रो बल आउने हो भने हामीले अझै राम्रो नतिजा हासिल गर्न सक्छौं,’ उनले भनिन्, ‘ आक्रमणमा हामीले थप मिहिनेत गर्न पनि जरुरि छ । भोलिको खेलका लागि एक ढिक्का भएर नतिजा हासिल गर्नेछौं ।’

बुधबारै हुने दोस्रो सेमिफाइनलमा भारत र बंगलादेश भिड्नेछन् । भारत समूह बी को विजेता हो भने बंगलादेश समूह ए मा नेपालभन्दा पछाडी रहेर सेमिफाइनलमा प्रवेश गरेको थियो । भारतले साफ च्याम्पियनसिपको इतिहासमा अहिलेसम्म हार बेहोरेको छैन र पछिल्ला चारै संस्करणमा उपाधि हात पारेको छ । यता नेपाल भने ३ पटक उपविजेता भैसकेको छ भने बंगलादेश पछिल्लो संस्करणको उपविजेता हो ।