काठमाडौं (हाम्रो खेलकुद) – नेपाली महिला राष्ट्रिय फुटबल टोली ओलम्पिक छनोटको दोस्रो चरणमा सहभागिता जनाउन आइतबार म्यानमारतर्फ प्रस्थान गरेको छ । एन्फा कम्प्लेक्स सातदोबाटोमा एन्फा अध्यक्ष कर्माछिरिङ शेर्पाले टोलीलाई बिदाइ गरे ।
विराटनगरमा सम्पन्न पाँचौ साफ महिला च्याम्पियनसिपमा उपविजेतामा सिमित नेपाली टोली फाइनलमा भारतसँग पराजित भएको थियो । नेपालले म्यानमारमा हुने प्रतियोगितामा पनि भारतसँग प्रतिस्पर्धा गर्नेछ । आयोजक म्यानमार र इन्डोनेसियाले पनि समूहको शीर्ष स्थानको लागि भिड्नेछन् । यस समूहबाट एक टोलीमात्र अर्को चरणमा अगाडी बढ्नेछ ।
म्यानमारविरुद्ध नेपालले पहिलो चरणमा बराबरी खेलेको थियो भने भारतमा आयोजित हिरो गोल्डकपको दुवै खेलमा पराजित भएको थियो । भारतविरुद्ध भने नेपालले पछिल्लो समय मिश्रित नतिजा निकालेको छ । ओलम्पिक छनोटको पहिलो चरणमा बराबरी खेलेको नेपालले हिरो गोल्डकपमा भारतलाई हराउँदै फाइनल यात्रा तय गरेको थियो । तर साफको फाइनलमा भने नेपाल पराजित भयो ।
नेपालको खेल तालिका :
३ अप्रिल – म्यानमार विरुद्ध नेपाल
६ अप्रिल – नेपाल विरुद्ध भारत
९ अप्रिल – इन्डोनेसिया विरुद्ध नेपाल
