एजेन्सी – एक गोलले पछाडी परेको स्थितिलाई उल्टाउँदै स्पेनिस ला लिगा अन्तर्गत आइतबार रियल म्याड्रिडले हुएस्कालाई ३-२ ले पराजित गरेको छ ।
खेलको तेस्रो मिनेटमा नै रियल खेलमा पछाडी परेको थियो । जुआन कामिलो हर्नान्डेजले उत्कृष्ट गोल गर्दै हुएस्कालाई अग्रता दिलाएका थिए । इस्कोले २५ औं मिनेटमा गोल गर्दै खेल बराबरीमा ल्याए । इस्कोलाई रियलबाट डेब्यु गरिरहेका ब्राहिम डियाजले असिस्ट दिएका थिए ।
दोस्रो हाफमा ड्यानी सेबालोसको ६२ औं मिनेटको गोलमा रियलले अग्रता लियो । तर जाबिएर एत्जेताले खेललाई ७२ औं मिनेटमा गोल गर्दै बराबरीमा ल्याए । बराबरीतर्फ उन्मुख देखिएको खेलमा रियलका फरवार्ड करीम बेन्जेमा नायक बने । उनले ८९ औं मिनेटमा उत्कृष्ट फिनिस गर्दै रियललाई जित दिलाए ।
जिदानलाई प्रशिक्षकका रुपमा नियुक्त गरेयता रियलले दुवै खेलमा जित हासिल गरेको छ । लिगको ९ खेल बाँकी रहँदा रियल शीर्षस्थानको बार्सिलोनाभन्दा १२ अंकले पछाडी छ । रियलको २९ खेलमा ५७ अंक छ भने समान खेलमा एटलेटिको ५९ र बार्सिलोना ६९ अंकसहित शीर्ष दुई स्थानमा छन् ।
