एजेन्सी – पल पोग्वाको दुई पेनाल्टी गोलमा म्यानचेस्टर युनाइटेडले इंग्लिस प्रिमियर लिग फुटबलमा वेस्टह्याम युनाइटेडलाई २–१ ले पराजित गरेको छ ।
घरेलु मैदान ओल्ड ट्राफोर्डमा युनाइटेडको कठिन जितमा पोग्वाले दुवै गोल पेनाल्टीमा गरे । वेस्टह्यामका फिलिपे एन्डरसनले एक गोल फर्काए ।
खेलको १९औं मिनेटमा रोवर्ट स्नुडग्रासले हुवाँन माटालाई बक्सभित्र फल गरेपछि प्राप्त पेनाल्टीमा पोग्वाले कुनै गल्ती गरेनन् ।
४९औं मिनेटमा पाहुना टोलीले बराबरी गोल फर्कायो । फिलिपे एन्डरसनले म्यानुयल लान्जिनीको पासमा गोल गरे ।
रायन फ्रेडरिक्सले गोलरक्षकसँगको वान टु वान अवस्थामा एन्थोनी मार्सियललाई लडाएपछि ८०औं मिनेटमा युनाइटेडले अर्काे पेनाल्टीको मौका पायो । जसलाई पोग्वाले सदुपयोग गर्दै महत्वपुर्ण ३ अंक दिलाए ।
जितसँगै पाँचौ स्थानमा उक्लिएको म्यानचेस्टर युुनाइटेडको ३३ खेलबाट ६४ अंक पुगेको छ । वेस्टह्याम ४२ अंकसहित ११औं स्थानमा रहेको छ ।
