एजेन्सी – इंग्ल्यान्डका युवा फरवार्ड जाडो सान्चोको दुई गोल सहयोगमा बोरुसिया डर्टमन्डले मेइन्जलाई पराजित गर्दै जर्मन बुन्डेस लिगाको शीर्षस्थानमा फर्किएको छ ।
डर्टमन्डले मेइन्जलाई २–१ ले पराजित गरेको हो । डर्टमन्डको जितमा दुवै गोल जाडोन सान्चोले गरे । यससँगै सान्चो जर्मन बुन्डेस लिगामा बढी गोल गर्ने कम उमेरका खेलाडी बनेका छन् । १९ वर्षीय सान्चोले यो सिजन २८ खेलमा ११ गोल गर्दै १३ गोलको लागि सहायता दिएका छन् । मेइनजका रोविन क्वाइसनले एक गोल फर्काए ।
१८औं मिनेटमा सान्चोले मारियो गोट्जेको पासमा गोल गर्दै डर्टमन्डलाई सुरुवाती अग्रता दिलाए । २४औं मिनेटमा थोमस डिलानेको पासमा सान्चोले व्यक्तिगत दोस्रो गोल गरेपछि डर्टमन्ड पहिलो हाफमै २–० ले अघि बढेको थियो ।
८३औं मिनेटमा रोविनले गोल गर्दै गोलअन्तर कम गरेपनि डर्टमन्ड २–१ ले विजयी हुन सफल भयो ।
जितसँगै डर्टमन्डको २९ खेलबाट ६६ अंक पुगेको छ । एक खेल कम खेलेको बायर्नको ६४ अंक छ । पराजित मेइन्ज ३३ अंकसहित १२औं स्थानमा छ ।
