लिभरपुल (एजेन्सी)– प्रिमियर लिगमा आइतबार चेल्सीविरुद्ध लिभरपुलले घरेलु मैदानमा २-० को जित निकाल्दा इजिप्सियन गोल स्कोरर मोहम्मद सलाहको भूमिका महत्वपूर्ण रह्यो।
जोर्डन हेन्डरसनको पासमा साडियो मानेले ५१ औं मिनेटमा लिभरपुललाई अग्रता दिलाएका थिए । त्यसको दुई मिनेटपछि सलाहले उत्कृष्ट गोल गर्दै घरेलु टोलीको अग्रतालाई दोब्बर पारे । पूर्व क्लब चेल्सीविरुद्ध गोल गरेपछि सलाहको सेलिब्रेसन हेर्न लायक थियो ।
सलाहको त्यो सेलिब्रेसन उनका आलोचकका लागि दिइएको जवाफको रुपमा लिइएको छ । उनले भ्रमणकारी चेल्सीका समर्थकसामु त्यो गोल सेलिब्रेसन गरेका थिए ।
केहि समयअघि सलाहका आलोचकले उनको धर्मलाई प्रहार गर्दै भिडियो सार्वजनिक गरेका थिए । ती समर्थकलाई चेल्सीले पनि प्रतिबन्ध लगाएको थियो । सलाहले एक खुट्टामा उभिएर दुवै हात जोडेर गरेको त्यो सेलिब्रेसनलाई सोही घटनासँग जोडेर हेरिएको छ ।
