एजेन्सी – लन्डन क्लब चेल्सी इंग्लिस प्रिमियर लिग फुटबलको तेस्रो स्थानमा उक्लिएको छ । प्रिमियर लिग अन्तरगत आइतबार राति भएको खेलमा वाट्फोर्डमाथि ३–० को सहज जित निकाल्दै चेल्सीले टोटेनहम हस्टपरलाई पछि पार्दै तेस्रो स्थानमा उक्लन सफल भएको हो ।
प्रिमियर लिगमा अन्तिम राउन्डको खेल बाँकी रहँदा चेल्सीले टोटेनहमलाई एक अंकले पछि पार्दै अर्काे सिजनको लागि च्याम्पियन्स लिगमा स्थान सुरक्षित गरेको हो । चेल्सीको ३७ खेलबाट ७१ अंक रहँदा टोटेनहम समान खेलबाट ७० अंक जोडेर चौथो स्थानमा छ ।
टोटेनहमको पनि अर्काे सिजनको च्याम्पियन्स लिगका लागि सम्भवाना यथावत छ । प्रिमियर लिगका शीर्ष चार टोलीले च्याम्पियन्स लिगमा स्थान बनाउने प्रावधान छ ।
घरेलु मैदान स्टामफोर्ड ब्रिजमा चेल्सीलाई सहज जित दिलाउन रुवेन लफटस चिक, डेभिड लुइज र गोन्जलो हिगुआइनले गोल गरे । सबै तीन गोल दोस्रो हाफमा सम्भव भएको थियो । पहिलो हाफमा चेल्सीले पाहुना टोलीलाई दवावमा रोखपनि गोलका लागि दोस्रो हाफ नै कुर्नुपरेको थियो ।
४८औं मिनेटमा इडेन हजार्डको पासमा रुवेनले गोल गर्दै चेल्सीलाई अग्रता दिलाए । त्यसको तीन मिनेट पछि नै डिफेन्डर डेभिड लुइजले हजार्डकै पासमा गोल गर्दै चेल्सीलाई २–० ले अघि बढाए ।
७५औं मिनेटमा गोन्जलो हिगुआइनले पेड्रो रोड्रिग्वेजको पासमा गोल गर्दै चेलसीलाई ३–० को सहज जित दिलाए ।
पराजित वाट्फोर्ड ५० अंक जोडेर १०औं स्थानमा छ ।
