एजेन्सी – चोटका कारण चेल्सीका मिडफिल्डर एङ्गोलो कान्टेले युरोपा लिगको खेल गुमाउने भएका छन् ।

चेल्सीले आज राति युरोपा लिगको सेमिफाइनलको दोस्रो लेगमा घरेलु मैदानमा जर्मन प्रतिद्वन्द्वी फ्रान्कफर्टको सामना गर्दैछ । पहिलो लेग १–१ गोलको बराबरीमा सकिएको छ । अवे गोलमा अघि रहेकाले चेल्सीले यही नतिजालाई कायम राख्न सके फाइनलमा प्रवेश गर्नेछ ।

प्रिमियर लिग अन्तरगत वाटफोर्डविरुद्ध ३–० को जित निकालेको खेलमा कान्टेले ह्यामस्ट्रिङको समस्या भोगेका थिए । नियमित उपचारमा रहेपनि २८ वर्षीय कान्टेले अबको तीन (युरोपा लिगको फाइनल) खेल खेल्ने न्युन सम्भवाना रहेको प्रशिक्षक मौरिजियो सार्रीले बताएका छन् ।

चेल्सीले फ्रान्कफर्ट, प्रिमियर लिगको अन्तिम खेलमा लेस्टर सिटी र युरोपा लिगको फाइनलमा पुगे फाइनले खेल्ने तालिका छ ।

प्रशिक्षक सार्रीले कान्टे ह्यामस्ट्रिङसँग जुधिरहेको र त्यति गम्भीर नरहेपनि उनले आराम गर्नुपर्ने बताएका छन् । उनले चेल्सी फाइनलमा पुगे कान्टे उपलब्ध हुन सक्ने समेत बताएका छन् । ‘उनी छिट्टै खेलमा फर्कनेमा हामी आशावादी छौं । तर, यो निश्चित छैन । हामीले सक्दो प्रयास गर्ने मात्र हो ।

यो सिजनका प्रिमियर लिगमा ३७ मध्ये ३६ खेलमा पहिलो रोजाईमा खेलेका कान्टेले चेल्सीलाई शीर्ष चारमा पुर्याउन महत्वपुर्ण भुमिका निभाएका थिए ।