इंगलिस प्रिमियर लिग अन्तर्गत हिजो भएको खेलमा म्यानचेस्टर युनाइटेडले वेस्ट ह्याम युनाइटेड संग ३-२को पराजय भोगेको छ|
आगामी सिजन च्याम्पियन्स लिग खेल्न जित अत्यावश्यक रहेको अवस्थामा युनाइटेडको यो हारले म्यानचेस्टर सिटिलाई भने ठुलो राहत पुगेको छ| अब अन्तिम दिनको खेल बाँकी रहेको अवस्थामा सिटि दुइ अंकले अगाडी छ र उसले अन्तिम खेलमा स्वान्सी संग बराबरी मात्र गरे पनि चौथो स्थान हासिल गर्नेछ| उता युनाइटेडले बर्नमाउथको सामना गर्नेछ र सिटीको हार भएको अवस्थामा मात्र उसको च्याम्पियन्स लिगको ढोका खुल्नेछ|
हिजो भएको खेलमा वेस्ट ह्याम्ले अग्रता लिएतापनि मार्सियलको दोश्रो हाफको दुइ गोलको मद्दतले युनाइटेड २-१ले अगाडी रहेको थियो| तर डिमित्री पाएटले दुइ राम्रो पास मिलाएपछि वेस्ट ह्याम खेलमा फर्किएको थियो| सो खेल वेस्ट ह्यामको अप्टन पार्क मैदानको अन्तिम खेल भएको हुनाले पनि खेलाडी र समर्थक हरु भावविव्हल देखिन्थे|
जितसंगै वेस्ट ह्याम पनि ६२ अंकका साथ छैठौं स्थानमा चढेको छ|
