भरतपुर (हाम्रो खेलकुद)– सिएमजी क्लब संकटा चितवनमा जारी सिएमएस भरतपुर गोल्ड कप फुटबल प्रतियोगिताको सेमिफाइनलमा पुगेको छ । अर्को ए डिभिजन क्लब जावलाखेल युथ क्लबलाई सोमबार पेनाल्टी सुटआउटमा ३–१ ले पराजित गर्दै संकटा अन्तिम चारमा पुगेको हो ।
यी दुई टोलीबीचको खेलको निर्धारित समय गोलरहित बराबरीमा टुंगिएको थियो । फाइनल प्रवेशका लागि अब संकटाले घरेलु टोली चितवन ११ को सामना गर्नेछ । जावलाखेलले दुई दिन अघि सिन्धु कपको उपाधि जितेको थियो ।
आजै बिहान मगमग झापा ११ सिएमएस च्यासललाई हराउँदै भरतपुर गोल्डकपको अन्तिम चारमा पुगेको थियो । खराब प्रकाशका अघिल्लो दिन १४ मिनेट अघि स्थागित भएको खेल त्यहिबाट सोमबार खेलाइएको थियो ।
झापाले आफ्नो अग्रतालाई जोगाउँदा भ्याली च्यासलमाथि २–१ को जित निकाल्दै अन्तिम चारमा पुगेको हो । क्याम्पा चौरमा सन्जोग राईको गोलबाट झापाले पहिलो मिनेटमा खेलमा अग्रता बनाएको थियो ।
निशान लिम्बुले पहिलो हाफको इन्जुरी समयमा थपेपछि झापा २–० ले अगाडि लागेको थियो । दोस्रो गोल खाएपछि च्यासलले त्यसको विरोधमा १० मिनेट खेल छोडेको थियो । पछि पुनः खेल सुरु भएपछि च्यासलका लागि पूर्णबहादुर गुरुङले ५९ औं मिनट मिनेटमा गोल गरेका थिए ।
६६ औं मिनेटमा पुग्दा खराब प्रकाशका कारण खेल रोक्नु परेको थियो । एजे इन्टरनेसनल प्रा लिको आयोजनामा जारी प्रतियोगिताको विजेताले ६ लाख रुपैयाँ प्राप्त गर्नेछ ।
