काठमाडौं (हाम्रो खेलकुद)– पंकज बिक्रम नेम्वाङ अखिल नेपाल फुटबल संघ (एन्फा) को वरिष्ठ उपाध्यक्षमा सर्वसम्मत चयन भएका छन् । एन्फा कार्यसमितिको मंगलबार बसेको कार्यसमिति बैठकले नेम्वाङलाई सर्वसम्मत चयन गरेको प्रवक्ता किरण राईले जानकारी दिएका छन् ।

केन्द्रिय कार्यसमितिको निर्वाचन भएको एक वर्षपछि एन्फाले वरिष्ठ उपाध्यक्ष पाएको छ । एन्फा विधान अनुसार ४ उपाध्यक्षमध्येका एक वरिष्ठ तोक्ने प्रावधान अनुसार नेम्बाङ चुनिएका हुन् ।

नेम्वाङसँगै अर्का उपाध्यक्ष वीरबहादुर खड्काले वरिष्ठ उपाध्यक्षमा दाबी गरेका थिए । बाँकी दुई उपाध्यक्ष कृष्ण थापा र उपेन्द्रमान सिंहले भने वरिष्ठमा दाबी गरेका थिएनन् । गत वर्ष वैशाख २२ गते भएको निर्वाचनमा नेम्वाङले उपाध्यक्ष मध्ये सर्वाधिक मत प्राप्त गरेका थिए ।

नेम्वाङ १७ वर्षदेखि लगातार एन्फा केन्द्रिय समितिमा रहँदै आएका छन् । चार कार्यकाल उनी केन्द्रिय सदस्य रहेका थिए । एन्फाका पूर्व अध्यक्ष गणेश थापाविरुद्धको आन्दोलनमा वर्तमान एन्फा अध्यक्ष कर्मा छिरिङ शेर्पालाई नेम्वाङले सुरुवातबाट साथ दिदै आएका थिए ।

नेम्वाङ वरिष्ठ उपाध्यक्ष चयन प्रक्रिया विवादरहित भने रहन सकेन । वरिष्ठ उपाध्यक्षका अर्का आकांक्षी खड्का र दुई केन्द्रिय सदस्य रत्नकुमार श्रेष्ठ र पूर्णकुमार चित्रकारले बैठक बहिष्कार गरेका थिए ।

एन्फा बैठकले २०७६र७७ को वार्षिक कार्यक्रम तथा बजेट पारित गरेको छ । कार्यक्रमहरु मध्ये जिल्ला लिग, प्रदेश लिग, र एन्फा प्रेसिडेन्ट लिगको नियमावलीहरु अनुमोदन गरी यसवर्ष देखि सञ्चालन गर्ने निर्णय गरेको छ । यस्तै आगमी वर्ष राष्ट्रिय लिग पनि गर्ने निर्णय गरेको छ ।

बैठकले भौतिक पुर्वाधार मर्मत सम्भार तथा निर्माण गर्न संघका सदस्यहरु ४५ जिल्ला फुटबल संघ, ‘ए’, ‘बी’ र ‘सी’ डिभिजन क्लबहरुको सम्भाव्यता अध्ययन गरी आगमी वर्षमा १० स्थानमा एकैपटक भौतिक पुर्वाधारहरु निर्माण गर्ने निर्णय गरेको छ ।

प्रदेश स्तरीय कार्यक्रमहरु सञ्चालन गर्न महासचिवको सहयोगीको रुपमा सातै प्रदेशमा संघका सहायक महासचिवहरुलाई जिम्मेवारी तोकिएको छ ।

प्रदेश १ मा बसन्त अर्याल, प्रदेश २ मा मोहम्मद समिउल्लाह, प्रदेश ३ मा मोहन कुमार बस्नेत, गण्डकी प्रदेशमा विश्व पौडल, प्रदेश ५ मा प्रकाश पंगेनी, प्रदेश ६ र ७ मा सदस्य प्रकाश विष्टलाई जिम्मेवारी तोकिएको छ ।

केन्द्रीय स्तरको अन्य कार्यक्रमका लागि सहायह महासचिव अरुणमान जोशीलाई जिम्मा दिइएको छ । संघको विभिन्न समितिमा रहेका सबैलाई संघको हित विपरित प्रतिक्रिया दिने कार्य नगर्न बैठकले सबैलाई आग्रह गरेको छ ।

यस्तै बैठकले २०७६ देखि सञ्चालनमा हुने एन्फा एकेडेमी बुटवल र धरानमा यसवर्ष देखि समान २५ खेलाडीहरु छनोट गरी प्रशिक्षण प्रदान गर्ने निर्णय पनि गरेको छ ।