काठमाडौं (हाम्रो खेलकुद) – सेथु फुटबल क्लब इन्डियन वुमन्स लिग (आइडब्यूएल) को फाइनलमा पुगेको छ । पन्जावस्थित गुरुनानक रंगशालामा सेन्ट्रल एसएसबीमाथि सोमबार ८–१ को सहज जित हात पार्दै दुई नेपाली खेलाडी सम्मिलित सेथु उपाधि नजिक पुगेको हो ।

बुधबार हुने फाइनलमा सेथुले मणिपुर पुलिसको सामना गर्नेछ । टोलीको जितमा नेपाली राष्ट्रिय महिला फुटबल टोलीकी सदस्य सावित्रा भण्डारीले ४ गोल गरिन् । भारतीय खेलाडी ग्रेसले ह्याट्रिक पुरा गरेको खेलमा रतनबाला देवीले १ गोल थपिन् ।

सावित्राले ४१, ५९ र ६५ औं मिनेटमा गोल गर्दै ह्याट्रिक पुरा गरेकी थिइन् । उनले चौथो गोल खेलको अन्तिम मिनेटमा गरेकी थिइन् । लिगमा सावित्राको यो तेस्रो ह्याट्रिक हो ।

टोलीको छैटौं खेलसम्म आइपुग्दा सावित्राको गोल संख्या १३ पुगेको छ । उनले एउटा बाहेक सबै खेलमा गोल गरेकी थिइन् । उनको तुलानामा नेपाली टोलीकी अर्की सदस्य अनिता बस्नेतले भने खासै मौका पाएकी छैनन् । लिगमा एकजना विदेशी खेलाडी मात्र मैदानमा उतार्न पाइने हुनाले सावित्रालाई आराम दिइएको खेलमा मात्र अनिताले पहिलो रोजाईमा खेल्ने मौका पाएकी थिइन् । उनले लिगमा एक गोल गरेकी छिन् ।

सेथुका लागि ग्रेसले १३ औं, पहिलो हाफको इन्जुरी समय र ५२ औं मिनेटमा गोल गरेकी थिइन् । रतनबालाले ७१ औं मिनेटमा गोल गरेकी थिइन् ।