विगतका सालहरुमा स्पेनिश ला लिगाको उच्च गोलकर्ताको शिर्ष दुइ स्थानमा क्रिस्टियानो रोनाल्डो र लिओनेल मेस्सीको नाम हुन्थ्यो, तर यो साल लुइस स्वारेजले सो परम्परा तोड्ने लगभग पक्का भएको छ|

सिजनको अन्तिम खेल बाँकी रहदासम्म स्वारेजले ३७ गोल गरेका छन् भने रोनाल्डोको नाममा ३३ गोल रहेको छ| लिओनेल मेस्सी २६ गोलसहित तेश्रो स्थान र रियल म्याड्रिडका करिम बेन्जेमा र बार्सिलोनाका नेयमार समान २४ गोल सहित चौथो स्थानमा छन्|

छ वर्षयता पहिलो पटक रोनाल्डो वा मेसिबाहेकको खेलाडीले ला लिगाको उच्चा गोलकर्ताको उपाधि जित्न लागेका छन्| यसअघि २००८/०९ सिजनमा अट्लेटिको म्याड्रिडका डिएगो फोर्लानले सो उपाधि जितेका थिए| विगत छ वर्षमा रोनाल्डो र मेस्सीले समान तिन-तिन पटक सो उपाधि जितेका छन्|

म्याड्रिड र बार्सिलोना दुवैले यो सिजन १०६ गोल गरेका छन्| रियल म्याड्रिडले सिजनको अन्तिम खेल डेपोर्तिभो ल कोरुनाको घरमा खेल्दैछ भने बार्सिलोनाले ग्रनाडामा आफ्नो अन्तिम खेल खेल्नेछ| बार्सिलोना ८८ अंकसहित पहिलो स्थानमा छ भने रियल म्याड्रिड ८७ अंक लिएर दोश्रो स्थानमा रहेको छ|