काठमाडौं (हाम्रो खेलकुद)- नेपाली राष्ट्रिय फुटबल टोलीका पहिलो रोजाईका गोलरक्षक किरण चेम्जोङ र स्टार फरवार्ड विमल घर्तिमगर माल्दिभ्स जान अझै केही दिन लाग्ने भएको छ ।

किरण र विमल आज माल्दिभ्स जाने पूर्वनिर्धारित तालिका रहेपनि विविध कारणले आज माल्दिभ्स जान नसकेको गोलरक्षक किरणले बताएका छन् । ‘विमल र म आजै माल्दिभ्स जाने तयारीमा थियौं । तर, आज प्राविधिक समस्याका कारण जान सकेनौ । अब अर्को साता मंगलबार वा बुधबार माल्दिभ्स जाने तयारीमा छौं,’ किरणले भने, ‘प्रि सिजनका लागि क्लबले बोलाइसकेको छ । हामीले केही दिन समय मागेर अलि ढिला जान लागेका छौं ।’

किरण र विमल माल्दिभ्सको टिसी स्पोर्टस् क्लबमा आबद्ध भएका छन् । टिसीमा किरणको यो लगातार तेस्रो र विमलको पहिलो सिजन हो । नेपाली टोलीले जेठ १९ गते मलेसिया र जेठ २३ गते चाइनिज ताइपेसँग मैत्रीपूर्ण खेल्ने तालिका छ । मुख्य प्रशिक्षक योहान कालिनले सोमबार मात्रै दुई मैत्रीपुर्ण खेलको लागि विराज महर्जनको कप्तानीमा २३ सदस्यीय टोलीको घोषणा गरेका थिए । किरण टिममा समावेश हुँदा विमलले भने चोटका कारण टिममा स्थान बनाउन सकेनन् ।

किरणले मैत्रीपूर्ण खेलको लागि के हुन्छ अहिले नै केही भन्न नसकिने बताएका छन् । किरणका अनुसार अखिल नेपाल फुटबल संघ (एन्फा) का महासचिव इन्द्रमान तुलाधरले मैत्रीपूर्ण खेलका लागि मलेसिया नै आउनुपर्ने बताएको र यसका लागि एन्फाले क्लबलाई पत्राचार गरिसकेको बताएको छ ।

‘एन्फा र क्लबको सहमति जे हुन्छ, हामीले त्यही अनुसार गर्ने हो । तर, प्रि सिजनका लागि क्लबले दुवई, कतार वा मलेसिया नै लाने तयारी गरेकोले सम्भवत मैत्रीपूर्ण खेलका लागि छाड्न नसक्ने बताएको छ । आशा गरौं उचित निष्कर्ष समयमा नै आउनेछ,’ उनले थपे । टिसीलाई गत सिजन लिग च्याम्पियन बनाउने क्रममा किरण उत्कृष्ट गोलकिपर घोषित भएका थिए ।