काठमाडौं (हाम्रो खेलकुद) – तेस्रो संस्करणको भारतीय महिला लिग फुटबलमा नेपाली गोलमेसिन सावित्रा भण्डारी र अनिता बस्नेत सम्मिलित सेथुले उपाधिका लागि मणिपुर पुलिस स्पोर्टस् क्लबसँग प्रतिस्पर्धा गर्दैछ ।

खेल नेपाली समयअनुसार अपरान्ह ४ः१५ बजेपछि लुधियानास्थित गुरु नानक स्टेडियममा हुनेछ । सावित्रा भण्डारीको उच्च प्रदर्शनमा अपराजित रहेर फाइनल यात्रा तय गरेको सेथु अपराजित रहँदै फाइनल जित्ने लक्ष्यमा मैदान उत्रनेछ । सावित्राले लिगको एक खेलमा मात्रै गोल गर्न सफल भइनन् । उनले ६ खेलमा १३ गोल गरेकी छन् । सेथुका लागि दाङमेई ग्रेस र सन्धियाले क्रमशः ८ र ७ गोल गरेकी छन् ।

अन्य खेलमा जस्तै फाइनलमा सावित्रा पुनः एक पटक चम्किए साविकको उपविजेता सेथु भारतीय महिला लिग फुटबलको च्याम्पियन बन्नेछ । समूह चरणको खेलमा सुथुले मणिपुर पुलिसलाई ६–४ ले पराजित गरेको थियो । सोही लयलाई सेथु निरन्तरता दिने रणनीतिमा मैदान उत्रनेछ । मणिपुर स्पोर्टस भने हारको बदला लिने लक्ष्यमा मैदान उत्रनेछ । दुवै टोलीले ६ खेलमा विपक्षी टोलीविरुद्ध समान ४१ गोल गरेका छन् । त्यसैले पनि फाइनल खेल निकै रोमाञ्चक र प्रतिस्पर्धात्मक हुने अनुमान गरिएको छ ।

समूहमा मणिपुरलाई पराजित गर्दा सावित्राले ह्याट्रिकसहित ४ गोल गरेकी थिइन् । भारतीय लिगमा सावित्राको त्यो डेब्यु खेल थियो ।
सेमिफाइनलमा सेथुले सेन्ट्रल एसएसबीलाई ८–१ को गोलअन्तरले पराजित गर्दा सावित्राले चार गोल गरेकी थिइन् । नेपालकी अनिता बस्नेतले पनि एक गोल गरेकी छन् । एक पटकमा एक विदेशी खेलाडी मात्र खेलाउन पाउने भएकाले उनले विरलै मौका पाएकी छन् ।