काठमाडौं (हाम्रो खेलकुद) – नेपाली राष्ट्रिय महिला टोलीकी सदस्य सावित्रा भण्डारी र अनिता बस्नेत भारतीय महिला फुटबल लिग खेलेर शनिबार स्वदेश फर्कदैछन् । सावित्राले शनिबार स्वदेश आइपुग्ने जानकारी दिइन् ।
सावित्रा र अनिता सम्मिलित सेथु फुटबल क्लब लिगको च्याम्पियन बनेको थियो । क्लबको उपाधि यात्रामा सावित्राको भूमिका महत्वपूर्ण रहेको थियो । मणिपुर फुटबल क्लबविरुद्ध बुधबार भएको फाइनलमा ३–१ ले सेथुले जितेको फाइनलमा सावित्राले २ गोल गरेकी थिइन् ।
फाइनल सम्म ७ खेल खेल्दा सावित्राले १५ गोल गरेकी थिइन् । सावित्राले टोलीलाई च्याम्पियन बनाउन र त्यसमा आफ्नो पनि सन्तोषजनक प्रदर्शन रहेकोमा खुसी व्यक्त गरिन् ।
उनीसँग टोलीमा आबद्ध अनिताले भने धेरै मौका पाइनन् । विदेशी एक जना खेलाडी मात्र मैदानमा रहन पाउने प्रावधानका कारण पनि अनिताले धेरै मौका पाइनन् । ७ मध्ये १ खेलमा मात्र अनिताले पहिलो रोजाईमा खेल्ने मौका पाएकी थिइन् ।
सावित्राले भने खेलेका ७ मध्ये ६ खेलमा पहिलो रोजाईमा खेलिन् । सावित्राले ७ खेलमा ३ ह्याट्रिक पनि पुरा गरिन् । व्यवासयिक करिअरमा एपिएफका सावित्रा र अनिताको यो भारत दोस्रो गन्तव्य हो । यसअघि यी दुवै माल्दिभ्स क्लबमा फुटसल खेल्न आबद्ध भएका थिए ।
