एजेन्सी – टोटेनहम हट्सपरका स्टार फरवार्ड ह्यारी केन च्याम्पियन्स लिग फाइनलका लागि तयार हुने भएका छन् । चोटका कारण टोटेनहमका लागि पछिल्लो केहि महिना विश्राममा रहेका केनले पुनरागमन गर्ने सम्भावना बलियो रहेको बुझिएको छ ।

च्याम्पियन्स लिगअन्तर्गत क्वाटरफाइनल चरणको पहिलो लेगमा म्यानचेस्टर सिटीविरुद्ध घाइते भएपछि केन मैदानबाहिर रहेका छन् । पछिल्लो केहि दिनयता केन क्लबको नियमित प्रशिक्षणमा सामेल भएको तस्बिर सार्वजनिक भएसँगै उनी मैदान फर्कने सम्भावना बढेको हो । शनिबार एटलेटिको म्याड्रिडको रंगशालामा हुने खेलका लागि पोचेटिनोले उनलाई छनोट गर्ने सम्भावना प्रबल छ ।

टोटेनहमका प्रशिक्षक पोचेटिनोले केनलाई खेलाउने भन्नेबारे निर्णय हतारमा नगर्ने प्रष्ट पारेका छन् । ‘हामी उनलाई खेलाउने वा नखेलाउने भन्नेबारे धेरै सोचिरहेका छौं । उनीमाथि जुन निर्णय लिएपनि खेलपछि त्यसबारे चर्चा हुन्छ । यदि हामीले जित्यौं भने राम्रो निर्णय हुन्छ, तर यदि पराजित भएमा त्यसै निर्णयलाई कारक बनाइन्छ,’ उनले भने ।

केनको अवस्था सुध्रंदै गएको अवस्थामा उनले फाइनलमा सुरुवाती रोजाईबाट नभएपनि खेलमा केहि भूमिका भने खेल्नेछन् । टोटेनहमसँगै इंग्ल्यान्डको राष्ट्रिय टोलीबाट पनि केनले त्यसपछि खेल्नुपर्ने छ । यूएईएफए नेसन्स लिगको अन्तिम चरणका लागि केन टोलीमा समेटिएका छन् ।