एजेन्सी – जर्मन च्याम्पियन बायर्न म्युनिखले इटालियन च्याम्पियन युभेन्टसबाट अर्जेन्टिनी फरवार्ड पाउलो डिबालालाई क्लबमा अनुबन्धन गर्ने प्रयास गरेको छ ।
सिजनको अन्त्यसँगै दुइ सिजनका लागि लोनमा आएका मिडफिल्डर हामेस रोड्रीग्वेज म्याड्रिड फर्केसँगै बायर्न आक्रमणमा खेलाडीको खोजीमा छ । अनुभवी विंगरद्वय आर्जेन रोबेन र फ्रान्क रिबेरीको प्रस्थानले बायर्न झनै समस्यामा परेको छ । यस्तो अवस्थामा बायर्नले डिबालालाई क्लबमा ल्याउने तयारी थालेको हो ।दुई क्लबबीच एक चरण वार्ता पनि भइसकेको जर्मन संचारमध्यमले जनाएका छन् ।
पछिल्लो समय लगातार लिग उपाधि जितिरहेपनि डिबाला युभेन्टसमा आफ्नो भूमिकालाई लिएर निराश छन् । रोनाल्डोको आगमनसँगै उनले पहिलो रोजाइमा सिमित अवसर पाएका छन् र त्यो आउने सिजन पनि परिवर्तन हुने सम्भावना कम छ । यस्तो अवस्थामा डिबालाले पनि अन्त्यत्र जाने सम्भावना प्रबल रहेको छ ।
बायर्नले इटालियन क्लबसंग पहिलो बैठकमा ८० मिलियन युरोको प्रस्ताव राख्ने तयारी गरेको थियो । तर युभेन्टसले १ सय मिलियन युरोको माग गरेको छ । बायर्नले खेलाडीसंग सम्झौता गर्न सके ट्रान्सफर रकममा सहमति हुन सक्ने बुझिएको छ ।
