काठमाडौं (हाम्रो खेलकुद)– मैत्रीपूर्ण खेलका लागि नेपाली राष्ट्रिय फुटबल टोलीका मिडफिल्डर रोहित चन्द इन्डोनेसियाबाट शनिबार मलेसिया पुग्ने भएका छन् । नेपाल र मलेसियाबीच आइतबार मैत्रीपूर्ण खेल हुँदैछ ।

रोहित इन्डोनेसियामा व्यवासायिक फुटबल खेल्दै आएका छन् । उनको टोली पेर्सिजाले शुक्रबार बालीविरुद्ध प्रतिस्पर्धा गर्नेछ । त्यो खेलपछि रोहित मलेसिया जाने उनका दाजु रोविनले हाम्रो खेलकुदलाई जानकारी दिए ।

मलेसियापछि नेपाली टोलीले जेठ २३ गते चाइनिज ताइपेसँग प्रतिस्पर्धा गर्नेछ । नेपाली टोलीका अन्य सदस्य बिहीबार मलेसिया पुगेका छन् । विदेशी प्रशिक्षक जोहान कालिनको नेतृत्वमा दोस्रो पटक विदेश यात्रामा निस्केको छ ।

यसअघि नेपाली टोलीले दुई मैत्रीपूर्ण खेलका लागि कुवेत भ्रमण गरेको थियो । कुवेतसँगको पहिलो खेलमा गोलरहित बराबरी खेलेको नेपाली टोलीले अर्को खेलमा १–० ले हार बेहोरेको थियो ।

नेपाली फुटबल टोली 
गोलरक्षक – किरण चेम्जोङ, एलन न्यौपाने, विकेश कुथु

डिफेन्डर – विराज महर्जन, सरोज दाहाल, रजिन धिमाल, सुमन अर्याल, अनन्त तामाङ, अजित भण्डारी, देवेन्द्र तामाङ, रवी सिलवाल

मिडफिल्डर/फरवार्ड-तेज तामाङ, सुनिल बल, विशाल राई, रोहित चन्द, विक्रम लामा, सन्तोष तामाङ, सुजल श्रेष्ठ, विमल राना, रविशंकर पासवान, अभिषेक रिजाल, अन्जन विष्ट, नवयुग श्रेष्ठ