लिभरपुल (एजेन्सी)– युरोपियन च्याम्पियन लिभरपुल प्रशिक्षक योर्गन क्लोपसँग पारिश्रमिक बढाएर लामो सम्झौता गर्ने तयारीमा रहेको छ । वर्षको १० मिलियन पाउन्ड सहित टोलीले क्लोपलाई लामो समयको लागि जिम्मेवारी दिने तयारी गरिएको बताएको छ ।
शनिबार प्रिमियर लिग प्रतिद्वन्द्वि टोटेनहमलाई २–० ले हराउँदै लिभरपुल आइतबार स्वेदश फर्केको थियो । टोलीको स्वागतमा क्लबका हजारौं समर्थक सडकमा ओर्लेका थिए ।
सन् २००५ पछि पहिलो पटक च्याम्पियन्स लिग जितेको लिभरपुलको त्यो क्लब इतिहासमा छटौं युरोपियन च्याम्पियन उपाधि हो । पछिल्लो तीन सिजन प्रशिक्षक क्लोप बार्षिक ७ मिलियन पाउन्डमा क्लबमा रहेका थिए । अब क्लबका मालिकहरु पनि उनको सम्झौता लम्बाउनुका साथै पारिश्रमिक बढाउने योजनामा छन् ।
क्लबका अध्यक्ष टोम वार्नरले ५१ क्लोपको तारिफ गरेका छन् । ‘उपाधि जितेपछि खेलाडीले खुसीले उनलाई उचालेका थिए । समर्थकलाई पनि थाहा छ उनको महत्व क्लबमा कत्ति छ भन्ने । उनी उत्कृष्ट प्रशिक्षक हुन्,’ त्यो भन्दा पनि ठूलो कुरा उनी निकै विनम्र छन् । समर्थकको महत्व उनले पनि बुझेका छन् ।’
