काठमाडौं (हाम्रो खेलकुद) – नेपाली पुरुष राष्ट्रिय फुटबल टोलीले बिहीबार अन्तर्राष्ट्रिय मैत्रीपूर्ण खेलमा चाइनिज ताइपेइको सामना गर्दैछ । ताइवानस्थित काओसिउङ रंगशालामा हुने खेल नेपाली समयअनुसार साँझ ४:४५ बजे सुरु हुनेछ ।

नेपालले आइतबार भएको खेलमा मलेसियासँग २-० को हार बेहोरेको थियो । उक्त खेल प्रशिक्षक कालिनका लागि लगातार दोस्रो हार थियो । दुई महिनाअघि मात्र नेपाल आएका कालिनले कुवेतविरुद्ध भएको पहिलो खेलमा गोलरहित बराबरी तथा दोस्रोमा १-० को हार बेहोरेका थिए । उनले हालसम्म खेलेका तीनै खेलमा नयाँ खेलाडी प्रयोग गर्दै आएका छन् । तीनै खेलमा गोल गर्न नसकेको नेपाल ताइपेइविरुद्ध गोलको खोजीमा हुनेछ ।

खेलको पूर्वसन्ध्यामा आयोजित पत्रकार सम्मेलनमा बोल्दै प्रशिक्षक कालिनले ताइपेइविरुद्ध खेल कठिन हुने बताए । ‘ हामी बलियो टोलीको सामना गर्दै आफ्नो परिक्षण गर्न तयार छौं । हाम्रो युवा टोली छ र बिस्तारै एकतृत हुँदैछौं । खेल कठिन हुनेछ तर हाम्रो लागि यो निकै महत्त्वपूर्ण अनुभव पनि हुन्छ । आशा छ राम्रो प्रदर्शन हुनेछ,’ उनले भने ।

प्रशिक्षक कालिनले खेलाडीहरु नियमित रुपमा घाइते हुने समस्या र अझैपनि टोलीका खेलाडीबारे बुझ्न बाँकी रहेकाले पहिलो रोजाईको खेलाडी छान्न कठिन भएको बताए । ‘ मलेसियाविरुद्ध फरवार्डको प्रदर्शन राम्रो रहन सकेन । खेलाडी घाइते हुने समस्या पनि छ । नयाँ टोली भएकाले स्थिर हुन केहि समय लाग्छ । म उपलब्ध खेलाडीलाई लिएर खुसी छु,’ उनले भने ।

कालिनले विश्वकप छनोटका लागि तयारी गरिरहेको हुनाले बलियो टोलीसँग खेल्ने बानि पार्नु भविष्यमा राम्रो हुने बताए । नेपालले फिफा विश्वकप २०२२ छनोटको दोस्रो चरणमा सिधै स्थान बनाएको हो । मलेसियाले भने प्लेअफमा टिमोर लेस्टेसँग खेल्दैछ ।