एजेन्सी – ब्राजिलियन सुपरस्टार नेयमार चोटका कारण घरेलु मैदानमा हुने कोपा अमेरिकामा सहभागी हुने छैनन् । कोपा अमेरिका सुरु हुनुभन्दा केहि दिन अघिमात्र कतारविरुद्ध मैत्रीपूर्ण खेलका क्रममा नेयमार घाइते भएका हुन् ।

नेयमार विश्वका सर्वश्रेष्ठ खेलाडीमा गनिन्छन । ब्राजिलले सन् २००७ देखिको उपाधिको खडेरी तोड्न नेयमारको भूमिका महत्त्वपूर्ण रहने अपेक्षा गरिएको थियो । तर घरेलु मैदानमा नेयमार उपस्थित हुन नसक्ने अवस्थामा पनि ब्राजिललाई खासै घाटा भएको देखिन्न । नेयमार बिनै ब्राजिलले कोपा अमेरिका जित्न सक्ने तीन कारण यसप्रकार छन् :

३. टोलीको उत्कृष्ट लय

कोपा अमेरिका सुरु हुनलाग्दा ब्राजिल प्रतियोगिताको सबैभन्दा उत्कृष्ट लयमा रहेको टोली रहेको छ । घरेलु मैदान भएकाले यसैपनि ब्राजिललै अन्य टोलीभन्दा बढी फाइदा हुनेछ । पछिल्लो १० खेलमा ब्राजिलले ९ जित र १ बराबरी खेलेको छ । ब्राजिलले पछिल्लो तीन वर्षयता एकै पद्दतिमा खेल्दै आएको छ । विश्वकपमा बेल्जियमसँग पराजित हुनुबाहेक ब्राजिलको प्रदर्शन राम्रो रहेको छ । कोपा अमेरिकामा सहभागिता जनाइरहेका अन्य ठूला टोली भने खासै राम्रो लयमा छैनन् । यसले पनि ब्राजिलको उपाधि सम्भावना बलियो बनाएको छ ।

२. बलियो डिफेन्स

ब्राजिल आक्रमणका लागि जति प्रख्यात छ डिफेन्समा पनि उत्तिकै स्तरीय खेलाडी उत्पादन गर्ने गर्दछ । यसपटक ब्राजिलको मुख्य डिफेन्डरका रुपमा अनुभवी डिफेन्डर थियागो सिल्भा र मिरान्डा रहनेछन् । यी दुईलाई युवा खेलाडीद्वय पीएसजीका मार्किन्होस र रियलका नयाँ डिफेन्डर इडर मिलिसाओले आवश्यक पर्दा सहयोग गर्नेछन् ।

यसबाहेक ब्राजिलसँग विङ्गब्याकका रुपमा विश्वकै उत्कृष्ट खेलाडी उपलब्ध रहेका छन् । कप्तान ड्यानी आल्भेसले राइट ब्याकको भूमिका निर्वाह गर्नेछन् । अर्कोतर्फ एटलेटिको म्याड्रिडका फिलिपे लुइस र युभेन्ट्सका एलेक्स स्यान्ड्रो पनि रहेका छन् । यसबाहेक डिफेन्सका तीन सदस्यले क्लब फुटबलमा सँगै खेल्नुले पनि ब्राजिललाई फाइदा हुनेछ । ब्राजिलले पछिल्ला ३६ खेलमा १० गोल मात्र खाएको छ । रक्षात्मक मिडफिल्डमा क्यासेमिरो र आर्थरको उपस्थितिले डिफेन्सलाई थप सहज पुग्नेछ । गोलरक्षकमा एलिसन र एडरसनको प्रतिस्पर्धा झनै रोमान्चक रहेको छ ।

१. आक्रमणमा आशालाग्दा युवा प्रतिभा

ब्राजिलले ग्रेमिओबाट व्यावसायिक फुटबल खेल्दै आएका २३ वर्षीय एभरटन सोआरेसलाई पनि टोलीमा समेटेका छन् । ब्राजिलको घरेलु लिगमा सुरुवाती ५ खेलमा ३ गोल गर्दै उनले सिनियर टोलीमा स्थान बनाए । उनको द्रुत गति र उत्कृष्ट बल नियन्त्रणले उनको खेल्ने शैली अझै प्रभावशाली देखिन्छ । उनले टोटेनहमका लुकास मोउरा, शाख्तार डोनेस्कका टाईसन र युभेन्ट्सका डग्लस कोस्टालाई पछि पार्दै टोलीमा स्थान बनाएका हुन् ।

प्रशिक्षक टिटेसँग आयाक्सका २२ वर्षे विंगर डेविड नेरेस र एसी मिलानका आक्रामक मिडफिल्डर लुकास पाकेटा पनि विकल्पका रुपमा छन् । यसबाहेक लिभरपुलका रोबर्टो फिर्मिनो र बार्सिलोनाका फिलिपे कोउटिन्हो नेयमारको स्थान लिन सक्छन् । ग्यब्रिएल जेससले आक्रमणको बागडोर सम्हाल्दा रिचार्लीसनले अर्को विंग सम्हाल्ने पक्कापक्कि देखिन्छ ।