एजेन्सी – कोपा अमेरिका २०१९ अन्तर्गत समूह चरणको दोस्रो खेलमा घरेलु टोली ब्राजिल भेनेजुएलासँग गोलरहित बराबरीमा रोकिएको छ ।
ब्राजिलले खेल अवधिभर बल पोसेसन र आक्रमणमा पकड बनाएपनि गोल गर्न नसक्दा अंक बाँड्नुपरेको हो । ब्राजिलले तीन पटक बल पोस्टभित्र छिराएपनि पटक-पटक फरवार्ड रोबर्टो फिर्मिनोको कारण गोल मान्य भएको थिएन । पहिलो हाफको ३९ औं मिनेटमा कप्तान ड्यानी आल्भेसको क्रसमा फिर्मिनोले गोल गरेपनि त्यसक्रममा उनले डिफेन्डर भिलानुएभालाई फल गरेपछि रेफ्रीले गोललाई मान्यता दिएनन् ।
दोस्रो हाफको ६० औं मिनेटमा ब्राजिलले गोल गरेको भन्दै खुसियाली पनि मनायो । फरवार्ड ग्यब्रिएल जेससले पेनाल्टी क्षेत्रको ठिक भित्रबाट गरेको प्रहारलाई फिर्मिनोले रोक्दै रिबाउन्डमा जेससले नै गोल गरेका थिए । तर रेफ्रीले भिडियो असिस्टेन्ट रेफ्री (भीएआर) को सहायता लिँदै फिर्मिनो अफसाइड रहेको निर्णय दिए ।
खेलको तीन मिनेट बाँकी रहँदा कोउटिन्होले गोल गरेपनि उक्त गोल पनि मान्य भएन । वैकल्पिक खेलाडी एभरटनले बलमा उत्कृष्ट नियन्त्रण देखाउँदै दिएको पासलाई फिर्मिनोलाई लाग्दै कोउटिन्होले गोलमा परिणत गरेपनि रेफ्रीले भीएआरकै सहायता लिँदै गोललाई मान्यता दिएनन् । उक्त मुभमा फिर्मिनोले ह्यान्डबल गरेको भेनेजुएलाका खेलाडीहरुको अपिल थियो ।
यस बराबरीसँगै ब्राजिलले अंक तालिकामा २ खेलमा १ जित र १ बराबरीका साथ शीर्षस्थान कायम रहेको छ । आजै भएको अर्को खेलमा पेरुले बोलिभियालाई ३-१ ले पराजित गर्दै दोस्रो स्थान हासिल गरेको छ । अब समूह विजेता छिनोफानोका लागि अन्तिम खेलमा ब्राजिल र पेरु भिड्नेछन् । ब्राजिल र पेरुको ४-४ अंक तथा भेनेजुएलाको २ र बोल्भिया अंकविहिन छ ।
यो पनि : कोपा अमेरिकाको खेल तालिका नेपाली समयमा
