काठमाडौं (हाम्रो खेलकुद) – नेपाली राष्ट्रिय फुटबल टोलीको जर्सी निर्माता केल्मीको खेल सामाग्री नक्कल गर्ने गिरोहलाई नेपाल प्रहरीले पक्राउ गरेको छ ।
केहि साताअघि मात्र एन्फाले राष्ट्रिय टोलीको जर्सी नक्कल गर्नेलाई चेतावनी दिएको थियो । उक्त सूचना निस्केको तीन सातापछि प्रहरीले विभिन्न स्थानमा छापा मार्दै केहि व्यक्तिलाई पक्राउ गरेको छ । महानगरीय अपराध महाशाखा टेकुका एसएसपी सहकुल थापाले जर्सी नक्कल गरेको उजुरी परेपछि केहि व्यक्ति पक्राउ परेको जानकारी दिए । उनले विस्तृत विवरण भने पछि सार्वजनिक गरिने बताए ।
गत फागुनमा एन्फा र केल्मीले राष्ट्रिय टोलीले प्रयोग गर्ने नयाँ स्वोरुपको जर्सी सार्वजनिक गरेका थिए । राष्ट्रिय फुटबल टोलीसँगै उमेर समुहका टोलीले प्रयोग गर्ने सामाग्री पनि केल्मीले प्रदान गर्दै आएको छ । नेपालमा केल्मीको विक्री तथा वितरण गर्ने सर्वाधिकार कामारु ट्रेडीङ प्रालिले प्राप्त गरेको र एन्फाको लोगो अंकित जर्सी उक्त संस्थाले मात्र गर्न पाइने सूचनामा उल्लेख थियो ।
एन्फाका अनुसार अन्य संस्थाले संघको लोगो प्रयोग गरेर राष्ट्रिय टोलीले प्रयोग गर्ने जर्सी बनाउन र बेचबिखन गर्न पनि पाइन्न । नेपाली बजारमा केल्मीको लोगो बिना एन्फा लोगोसहित उस्तै स्वरुपको नक्कली जर्सी बाहिरिन थालेपछि एन्फाले सूचना जारि गरेको थियो । सूचना जारि गरेपछि पनि बजारमा नक्कली जर्सी बेच्ने कार्य नरोकिएपछि प्रहरीमा उजुरी गरेर कारवाही अगाडी थालिएको एन्फा स्रोतले जनायो । नक्कल गरिएको अधिकांश जर्सीमा एन्फाको मात्र लोगो रहेको र जर्सी निर्माता केल्मीको भने लोगो हटाइएको थियो ।
