एजेन्सी – कोपा अमेरिका २०१९ अन्तर्गत समूह ‘बी’ को अन्तिम खेलमा अर्जेन्टिनाले कतारलाई २-० ले पराजित गर्दै क्वाटरफाइनलमा स्थान सुरक्षित गर्यो ।

खेलअघि कतारको पनि दोस्रो चरणमा पुग्ने सम्भावना रहेको थियो । तर लौटारो मार्टिनेज र सर्जियो अगुएरोले दुवै हाफमा १-१ गोल गरेपछि अर्जेन्टिना अघिल्लो चरणमा पुगेको थियो । कतार भने अंक तालिकाको पुछारमा रहँदै समूह चरणबाट बाहिरिएको छ । कतारका प्रशिक्षक फेलिक्स सान्चेजले खेलपछि बोल्दै मेस्सीसँग खेल्नुले टोलीको लागि राम्रो अनभव रहेको बताएका छन् ।

‘अवश्य पनि मेस्सीजस्ता खेलाडीले खेलको नतिजा बदल्न सक्छन् । कहिले गोल त कहिले असिस्टको सहयोगले । हामीले उनीलाई आउने पास नै रोक्ने प्रयास गरेका थियौं जसले गर्दा उनले खेलमा सहभागी हुने मौका नपाउन् । तर त्यो गर्न सहज थिएन किनकि उनले मैदानका धेरै भागमा प्रभाव पार्न सक्छन्,’ उनले भने ।

‘ हाम्रो योजना अनुसार मेस्सीले गोल गर्न त सकेनन् तर हामीले २ गोल भने खायौं । मेस्सीले गोल नगरेपनि नतिजा भने हाम्रो पक्षमा रहेन । तर उनीसँग खेल्नु हाम्रो लागि राम्रो अनुभव रहयो । विश्वका सबैभन्दा निर्णायक खेलाडीसँग खेल्दा हाम्रो टोलीले भविष्यमा सुध्रने पक्षहरु भेटेको छ,’ बार्सिलोनाको युवा टोलीका प्रशिक्षक रहिसकेका सान्चेजले थपे ।