काठमाडौं (हाम्रो खेलकुद) – नेपाली राष्ट्रिय फुटबल टोलीका भरपर्दा खेलाडी रोहित चन्द सम्मिलित इन्डोनेसियाको लिग वन च्याम्पियन्स पर्सिजा जकार्ताले नयाँ सिजनमा खराब सुरुवात गरेको छ ।

लिगको चौथो खेल सकिँदा पर्सिजा अंक तालिकाको १५ औं स्थानमा छ । ४ खेलमा २ बराबरी र २ हारसँगै पर्सिजा गोलअन्तरका आधारमा रेलिगेसन क्षेत्रभन्दा माथि रहेको छ । अघिल्लो सिजन पर्सिजाले लिग उपाधि जित्दा रोहित लिगकै सर्वोत्कृष्ट खेलाडी घोषित भएका थिए । यस सिजन भने पर्सिजाले अपेक्षित सुरुवात गर्न सकेको छैन ।

रोहितले भने सबै खेलमा पहिलो रोजाइमा खेल्दै पूरै ९० मिनेट नै मैदानमा बिताएका छन् । उनले यसक्रममा मिडफिल्डमा खेल्दै प्रभावशाली प्रदर्शन पनि गरेका छन् । तर पर्सिजाले नतिजा ल्याउन भने सकिरहेको अवस्था छैन । सिजनको सुरुवाती खेलमा पर्सिजा बारितो पुतेरासँग १-१ को बराबरीमा रोकिएको थियो ।

दोस्रो खेलमा पीएसआइएस सेमाराङसँग २-१ ले पराजित पर्सिजा तेस्रो खेलमा पनि बालि युनाइटेडसँग पराजित भएको थियो । शनिबार भएको पेरसेलाविरुद्धको खेल गोलरहित बराबरीमा सकिएपछि पर्सिजाले दोस्रो अंक जोडेको हो । पर्सिजाले सिजनको सुरुवाती ४ खेल नै अवे मैदानमा खेलेको छ ।

पर्सिजाले अब अर्को लिग खेलमा बुधबार पीएसएस स्लेमानको सामना गर्नेछ । अंक तालिकाको शिर्ष स्थानमा रहेको बाली युनाइटेडले ४ खेलमा ४ जित दर्ता गरेको छ ।