जेठ १९ गते ,काठमाडौं –
अखिल नेपाल फुटबल संघ (एन्फा) ले बर्खास्त गरिएका आफ्ना तीन पदाधिकारी र सदस्यलाई पुर्नबहालीका लागि मागेको समयमा विश्व फुटबल महासंघ (फिफा) र एसियाली फुटबल महासंघ (एएफसी) ले सहमति जनाएको छ ।
फिफाको निर्देशनअनुसार पूर्नबहालीको लागि केन्द्रिय समितिको बैठक डाक्नु पर्ने भएकाले त्यो सम्मका लागि सहमति दिन एन्फाले पत्रमार्फत अनुरोध गरेको थियो । त्यसमा फिफा एएफसी सहमत भएको हो । लगातार तीनवटा बैठकमा उपस्थित नभएको भन्दै एन्फाले असोज ११ गते उपाध्यक्ष कर्मा छिरिङ शेर्पा, विजयनारायण मानन्धर, किशोर राई र सदस्य पंकज नेम्बाङलाई बर्खास्त गरेको थियो । जेठ १९ गते पुर्नबहालीपछि एन्फामा पछिल्लो दुई बर्षदेखि चल्दै आएको विवादको औपचारिक रुपमा अन्त्य हुने विश्वास गरिएको छ ।
अध्यक्ष गणेश थापाको कार्यशैली, अपारदर्शीता, भ्रष्टाचारको विरोध गर्दै शर्पाको अगुवाईमा असन्तुष्ट पक्षले अभियान चलाउँदै आएको थियो । फिफाले वैशाख २७ गते बर्खास्त गरिएका तीन उपाध्यक्ष र सदस्यलाई जेठ १० गते भित्र पूर्नबहाली गरिसक्न एन्फालाई निर्देशन दिएको थियो । एन्फाको पत्रको जवाफ दिदै क्रममा फिफाले साधारण सभा र अध्यक्षको निर्वाचन गर्न पुनः जोड दिएको छ । वैशाख २७ मा पनि फिफाले अढाइ बर्षदेखि हुन नसकेको साधारण सभा छिटो भन्दा छिटो गर्न र त्यसबाट अध्यक्षको निर्वाचन गर्न निर्देशन दिएको थियो ।
एन्फा अध्यक्ष गणेश थापाको उजुरी फिफाको अपिल कमिटीले पूर्ण रुपमा खारेज गरेको दुई सातापछि फिफाले अध्यक्षको निर्वाचन गर्न एन्फालाई निर्देशन दिएको थियो । थापालाई फिफाको एथिक्स कमिटिले कात्तिक २९ गते भ्रष्टाचारको अभियोगमा १० बर्ष प्रतिबन्ध गर्नुका साथ करिब २१ लाख रुपैयाँ जरिवाना तोकेको थियो ।
