एजेन्सी– बार्सिलोनाका उपाध्यक्ष जार्डी कोर्डेनेरले पेरिस सेन्ट जर्मेन (पिएसजी) का फरवार्ड नेयमार क्लबमा फर्कन चाहेपनि अहिले सम्म सम्झौता भने भइनसकेको बताएका छन् । चार वर्ष बार्सिलोनामा बिताएर नेयमार पिएसजी पुगेका थिए ।

विश्व कीर्तिमानी रकममा सन् २०१७ मा पिएसजी पुगेका २७ वर्षे फरवार्ड उच्च प्रदर्शनका बाबजुद क्लबमा पूर्णरुपमा स्थापित हुन असफल भएका छन् । ‘ उनी बार्सिलोना फर्कन चाहन्छन् , बार्सिलोनाका उपाध्यक्षले भने, ‘हामी अहिले टोली पुननिर्माणमा छौं । त्यसैले अहिले यस्तो भन्ने अवस्था छैन ।’

नेयमारले पीएसजी छाडेमा कता जान्छन् भन्ने विषयमा सोधिएको प्रश्नमा कोर्डेनेरले भने, ‘सम्भवत: उनी बार्सिलोना फर्कन चाहन्छन् ।’ तर, उनले नेयमार र क्लबबीच पुनः सम्झौताका लागि कुराकानी नभएको बताएका छन् ।

नेयमार २ सय २० मिलियन युरोमा पिएसजी गएका थिए । उनी गएदेखि पिएसजीले लगातार दुई सिजननै लिग १ को उपाधि जितेको छ । उनले गएको सिजनमा ३६ लिग खेलमा ३४ गोल गरेका थिए । तर पनि ड्रेसिङ रुपमा उनका लागि वातावरण सहज छैन । सहकर्मी एडिन्सन काभानी र किलियन एम्बाप्पेसँग सुमधुर सम्बन्ध नहुँदा उनको खेलमा पनि असर परेको छ ।

स्पेनिस सञ्चारमाध्यमका अनुसार नेयमार आफ्नो तलबमा वर्षको १२ मिलियन कम गरेर भएपनि बार्सिलोना फर्कन तयार रहेको बताइएको छ । एट्लेटिको म्याड्रिडबाट एन्टोनी ग्रिज्मन १ सय २० मिलियन युरोमा बार्सिलोना पुग्ने सम्भावना छ । आयक्सबाट फ्रेन्की डी जोङ ७५ मिलियन युरोमा बार्सिलोना पुगिसकेका छन् ।