काठमाडौं – राष्ट्रिय फुटबल टोलीका स्ट्राइकर बिमल घर्ती मगरकी बहिनी १७ बर्षे मनीषा आफ्नै घरमा मृत अवस्थामा फेला परेकी छिन् । नवलपरासी बर्दघाट नगरपालिका ८ भुताहास्थित घरमा उनलाई बिहीबार बिहान मृत अवस्थामा भेटेपछि प्रहरीले अनुसन्धान सुरु गरिसकेको छ ।
विमल र आमाका साथमा मनीषा (बायाँ) । फाइल तस्बिर ।
नवलपरासी फुटबल संघका अध्यक्ष प्रकाश पंगेनीका अनुसार घरमा विमलकी बहिनी एक्लै थिइन् । उनीकी आमा कामको सिलसिलामा अघिल्लो दिन बुटबल गएकी रहिछन्, विमलको घर पुगेर फर्केका पंगेनीले भनेका छन् । बुटबलबाट बिहीबार बिहान घर पुग्दा आमाले छोरीलाई मृत अवस्थामा देखेपछि प्रहरीलाई खबर गरेको बताइएको छ ।
विमल भने केही दिनअघि फिटनेस परिक्षणका लागि युरोप गएका थिए । पंगेनीका अनुसार विमललाई पनि घटनाको जानकारी गराइसकिएको छ ।
