मिलान (एजेन्सी) – युरोपियन च्याम्पियन्स लिग फुटबल फाइनलको पहिलो हाफमा रियल मड्रिडले १–० ले अग्रता लिएको छ । सहरी प्रतिद्वन्द्वि एट्लेटिको मड्रिडविरुद्ध कप्तान सर्जियो रामोसले नजिकबाट गोल गर्दै रियललाई अग्रता दिलाएका हुन् । १५ औं मिनेटमा टोली क्रुसको फ्रिकिकलाई गेराथ बेलले फ्लिक हेड गरेपछि नजिकबाट रामोसले गोल गरेका हुन् ।
एट्लेटिकोविरुद्ध गोल गरेपछि रियलका कप्तान सर्जियो रामोस ।
रामोस तीनै खेलाडी हुन्, जसले दुई बर्षअघि सोही टोलीविरुद्ध इन्जुरी समयमा गोल गर्दै खेललाई थप समयतर्फ धकलेका थिए । जहाँ रियल ४–१ ले विजयी हुँदै १० औं पटक च्याम्पियन्स लिग उपाधि जित्न सफल भएको थियो । अहिले रियाल ११ औं पटक उपाधि जित्ने योजनामा छ । सबैभन्दा बढी च्याम्पियन्स लिग उपाधि जित्ने कीर्तिमान रियलकै नाममा छ । एट्लेटिकोले अहिले सम्म च्याम्पियन्स लिग जित्न सकेको छैन । रियलका स्टार क्रिस्टियानो रोनाल्डोले भने अपेक्षा अनुसारको प्रदर्शन गर्न सकेका छैनन् । जारी सिजनमा च्याम्पियन्स लिगमा उनले १६ गोल गरेका थिए । आज फाइनलमा गोल गर्न सके च्याम्पियन्स लिगको एकै सिजनमा सर्वाधिक गोल गर्ने आफ्नै कीर्तिमान उनले भंग गर्नेछन् । तर, मिलानमा उनले अहिले सम्म गोल गर्न सकेका छैनन् ।
