एजेन्सी – मिडफिल्डर एलेक्स अक्सलेड चेम्वरलेनले मर्सिसाइड क्लब लिभरपुलमा सम्झौता नवीकरण गरेका छन् । चेम्वलेनले लिभरपुलसँग थप पाँचवर्षको लागि सम्झौता नवीकरण गरेको हो ।

यससँगै इंग्ल्यान्डका २६ वर्षीय मिडफिल्डर चेम्वरलेन २०२३ सम्म लिभरपुलमै रहने भएको छ । २५ अप्रिल २०१८ मा च्याम्पियन्स लिगको सेमिफाइनलमा एएस रोमाविरुद्धको खेलमा घुडाको सिरियस इन्ज्युरीबाट करिव एक वर्ष विश्राममा रहेका चेम्वरलेनले २६ अप्रिल २०१९मा हर्डसफिल्डविरुद्धको ५–० को जित निकालेको खेलमा वैकल्पिक खेलाडीको रुपमा मैदानमा प्रवेश गर्दै पुनरागमन गरेका थिए ।

चेम्वरलेन २०१७ मा इंग्लिस क्लब आर्सनलबाट ३५ मिलियन पाउन्डमा आबद्ध भएका थिए । त्यसयता चेम्वरलेन टोलीको महत्वपुर्ण सदस्य रहिसकेका छन् ।

लिभरपुलमा सम्झौता नवीकरण भएसँगै चेम्वरलेनले आफु निकै उत्साहित रहेको बताएका छन् । ‘निकै उत्साहित छु । मैले एक वर्ष खेल गुमाए । मलाई लिभरपुलले विश्वास गरेर सम्झौता नवीकरण हुदा साँच्चिकै नै उत्साहित छु । मैले एक वर्षमा हराएको मेरो समयलाई फिर्ता गर्ने उचित अवसर आएको छ । आशा छ, यो सिजन राम्रो गर्ने प्रयासमा हुनेछु ।’ चेम्वरलेनले सम्झौता नवीकरणपछि भनेका छन् ।

चेम्वरलेनलले नयाँ सिजनमा १६ महिना पछि पुर्व क्लब साउथह्याम्टनविरुद्ध २–१ को जित निकालेको खेलमा पहिलो रोजाईमा सुरुवात गरेका थिए । उनले लिभरपुलका लागि ४७ खेलमा ५ गोल गरेका छन् ।