काठमाडौं (हाम्रो खेलकुद) – विंगर प्रकाश बुढाथोकी न्यूरोड टिम (एनआरटी) मा आबद्ध भएका छन् । सहिद स्मारक ‘ए’ डिभिजन लिग च्याम्पियन सिग्नेचर मनाङ–मस्र्याङ्दी क्लबबाट प्रकाश एनआरटी पुगेका हुन् ।

उनीसँग एक वर्षको सम्झौता भएको एनआरटीका महासचिव नरेन्द्रमान श्रेष्ठले हाम्रो खेलकुदलाई जानकारी गराए । अनुबन्ध रकम भने खुलाइएको छैन । महासचिव श्रेष्ठले लिग नजिकिदै गर्दा केही सिनियर खेलाडीहरुलाई टोलीमा समेट्ने क्रममा प्रकाशलाई अनुबन्ध गरेको बताए ।

क्लबमा अझै सिनियर खेलाडीको कोटा रहेकाले नाम चलेका खेलाडी अनुबन्ध गर्ने प्रयास भइरहेको श्रेष्ठले जानकारी दिए । अघिललो सिजनका युवा खेलाडीहरु पनि रहेकोले यसपटक अझै टोली अझै बलियो हुने क्लबले विश्वास लिएको श्रेष्ठले सुनाए ।

प्रकाश अघिल्लो सिजन लिग च्याम्पियन मनाङमा अनुबन्ध भएपनि पहिलो खेलमै चोट लागेपछि उनले बाँकी सिजन बेन्चमा बिताउनु परेको थियो । चोटमुक्त भएपनि उनले मनाङबाट मोफसलका विभिन्न गोल्डकप खेले । मनाङ जानुअघि प्रकाशले एक सिजन भुटानी लिगमा बिताएका थिए ।त्यसअघि उनले रुस्लान थ्री स्टार क्लबमा केहि वर्ष बिताएका थिए ।

अघिल्लो सिजन रेलिगेसन विनाको लिगमा एनआरटी ६ अंक जोडेर पुछारमा रहेको थियो ।
अखिल नेपाल फुटबल संघ (एन्फा) ले यसपटकको ‘ए’ डिभिजन लिग मंसिर १३ गते गर्ने घोषणा गरेको छ । नेपालमा मंसिरमा आयोजना हुने १३ औं दक्षिण एसियाली खेलकुद (साग) तोकिएको समयमा हुने खण्डमा लिग सर्ने निश्चित छ । १३ औं साग मंसिर १५ देखि २४ गते सम्मका लागि तय भएको छ ।