एजेन्सी – डिफेन्डर प्याट्रिक भान आनहोल्टले इन्ज्युरी समयमा गोल गरेपछि क्रिस्टल प्यालेसले म्यानचेस्टर युनाइटेडलाई प्रिमियर लिगको खेलमा २-१ ले पराजित गरेको छ ।

मिडफिल्डर ड्यानीएल जेम्सले निर्धारित समयको २ मिनेट समय बाँकी रहँदा बराबरी गोल गरेपछि म्यानचेस्टर युनाइटेडले प्यालेसविरुद्ध हार टार्ने देखिएको थियो । तर काउन्टर अट्याकमा आनहोल्टले गोल गर्दै युनाइटेडलाई जितबाट बन्चित गरे ।

जोर्डन आयुले खेलको ३२ औं मिनेटमा पाहुना टोलीलाई अग्रता दिलाएका थिए । जेफ्री स्लपको पासमा आयुले गोल गर्दै घरेलु समर्थकलाई स्तब्ध पारेका थिए । दोस्रो हाफको ७० औं मिनेटमा युनाइटेडले पेनाल्टीमार्फत खेल बराबरी गर्ने अवसर पाएको थियो । तर मार्कस रासफर्डको प्रहार पोस्टमा लाग्दै बाहिरियो ।

युनाइटेडको जारि लिगमा पहिलो हार पनि हो । पहिलो खेलमा चेल्सीलाई ४-० ले पराजित गरेको युनाइटेड दोस्रो खेलमा वल्भ्ससँग १-१ को बराबरीमा रोकिएको थियो । यस नतिजासँगै युनाइटेडको ३ खेलमा ४ अंक तथा क्रिस्टल प्यालेसको पनि ३ खेलमा ४ अंक नै भएको छ ।

अन्य खेलको नतिजा:
नर्विच २-३ चेल्सी
ब्राइटन ०-२ साउथह्याम्पटन
म्यानचेस्टर युनाइटेड १-२ क्रिस्टल प्यालेस
सेफिल्ड युनाइटेड १-२ लेस्टर सिटी
वाटफर्ड १-३ वेस्ट ह्याम युनाइटेड